AQŞ-tıñ Ukrainadağı elşisiniñ mindetin atqarıp jatqan Bill Teylor prezident Trampqa impiçment jariyalau turalı saualdarğa jauap berdi. Ol Tramptıñ Europa odağındağı AQŞ elşisi Gordon Sondland mırzağa habarlasıp, Baydenge qatıstı qılmıstıq is jöninde swrağanın rastadı. Bwğan deyin Tramp Ukrainadağı amerikalıq diplomattarmen bwl taqırıpta söyleskeni «esinde joq ekenin» jäne Sondland mırzanı «onşa tanımaytının» aytqan bolatın.

Bill Teylor mırzanıñ kuälik etuinen keyin prezident Trampqa impiçment jariyalau mümkindigi joğarlay tüsti. Onıñ üstine Ukrainadağı keybir amerikalıq diplomattar Sondland mırzanıñ bir ret tamaqtanu kezinde älde kimdermen söylesip otırıp «Ukraina jaq isti alğa jıljıtuğa kelisti» degen sözder qoldanğanın aytqan.

Şildeden beri Trampqa qarsı impiçment jariyalau turalı mäseleler qaralıp keledi. Onda Tramp Ukrainanıñ jaña saylanğan prezidenti Vladimir Zelenskiymen telefon arqılı söylesken kezde Jo Baydenniñ wlı Hanter Baydenniñ üstinen jemqorlıq ayıbı boyınşa is qozğaudı talap etip, eger Zelenskiy ükimeti bwlay jasamasa Ukrainağa beriletin 400 mln dollar qwnına ie äskeri kömekti keşiktiretinin aytqan.

Tramptıñ bwl äreketi «qızımet mümkindiginen paydalanıp, Ukainağa qısım tüsirdi» dep ayıptalğan bolatın. Eger osı äreketi tolıq däleldense, onda AQŞ prezidentin qızmetinen qaldıruğa tolıq negiz bar. Sebebi, ol Ukrainadan ayıptaudı talap etken Bayden Demokratiyalıq partiyanıñ ümitkeri Jo Baydenniñ wlı. Tramp öz äreketi arqılı qarsılasınıñ bedelin tüsirudi maqsat etken degen boljamdar da bar.

Biraq, prezident Tramp öz kezeginde äkeli-balalı Baydenderdi zañsız ärekettermen ayıptağan. Tramp Baydendi qızmet mümkindiginen asıra paydalanıp, Ukraina qauipsizdik qızmetkerlerine qısım tüsirip, wlına qarsı qılmıstıq isti küşpen japtırğan degen ayıbın tağıp otır.

Tramptıñ impiçmenti Senattıñ üşten eki ökili qoldağanda ğana jüzege aspaq. Biraq, AQŞ tarihında birde bir prezident qızmetinen quılıp körgen joq. 230 jıl işinde tek eki prezidentke ğana impiçment jariyalanğan, biraq olar ayıp astında öz qızmetterin jalğastırğan. Keybir sarapşılar osılardı alğa tarta otırıp, sonday-aq, AQŞ Senatında qazirgi kezde Respublikaşıldardıñ üstemdik qwrıp otırğanın eskere otırıp, Tramptıñ qızmetten quıluı mümkin emes degen boljam aytadı.

“The Qazaq Times”