اقش-تىڭ ۋكرايناداعى ەلشىسىنىڭ مىندەتىن اتقارىپ جاتقان بيلل تەيلور پرەزيدەنت ترامپقا يمپيچمەنت جاريالاۋ تۋرالى ساۋالدارعا جاۋاپ بەردى. ول ترامپتىڭ ەۋروپا وداعىنداعى اقش ەلشىسى گوردون سوندلاند مىرزاعا حابارلاسىپ، بايدەنگە قاتىستى قىلمىستىق ءىس جونىندە سۇراعانىن راستادى. بۇعان دەيىن ترامپ ۋكرايناداعى امەريكالىق ديپلوماتتارمەن بۇل تاقىرىپتا سويلەسكەنى «ەسىندە جوق ەكەنىن» جانە سوندلاند مىرزانى «ونشا تانىمايتىنىن» ايتقان بولاتىن.

بيلل تەيلور مىرزانىڭ كۋالىك ەتۋىنەن كەيىن پرەزيدەنت ترامپقا يمپيچمەنت جاريالاۋ مۇمكىندىگى جوعارلاي ءتۇستى. ونىڭ ۇستىنە ۋكرايناداعى كەيبىر امەريكالىق ديپلوماتتار سوندلاند مىرزانىڭ ءبىر رەت تاماقتانۋ كەزىندە الدە كىمدەرمەن سويلەسىپ وتىرىپ «ۋكراينا جاق ءىستى العا جىلجىتۋعا كەلىستى» دەگەن سوزدەر قولدانعانىن ايتقان.

شىلدەدەن بەرى ترامپقا قارسى يمپيچمەنت جاريالاۋ تۋرالى ماسەلەلەر قارالىپ كەلەدى. وندا ترامپ ۋكراينانىڭ جاڭا سايلانعان پرەزيدەنتى ۆلاديمير زەلەنسكيمەن تەلەفون ارقىلى سويلەسكەن كەزدە جو بايدەننىڭ ۇلى حانتەر بايدەننىڭ ۇستىنەن جەمقورلىق ايىبى بويىنشا ءىس قوزعاۋدى تالاپ ەتىپ، ەگەر زەلەنسكي ۇكىمەتى بۇلاي جاساماسا ۋكرايناعا بەرىلەتىن 400 ملن دوللار قۇنىنا يە اسكەري كومەكتى كەشىكتىرەتىنىن ايتقان.

ترامپتىڭ بۇل ارەكەتى «قىزىمەت مۇمكىندىگىنەن پايدالانىپ، ۋكايناعا قىسىم ءتۇسىردى» دەپ ايىپتالعان بولاتىن. ەگەر وسى ارەكەتى تولىق دالەلدەنسە، وندا اقش پرەزيدەنتىن قىزمەتىنەن قالدىرۋعا تولىق نەگىز بار. سەبەبى، ول ۋكراينادان ايىپتاۋدى تالاپ ەتكەن بايدەن دەموكراتيالىق پارتيانىڭ ۇمىتكەرى جو بايدەننىڭ ۇلى. ترامپ ءوز ارەكەتى ارقىلى قارسىلاسىنىڭ بەدەلىن ءتۇسىرۋدى ماقسات ەتكەن دەگەن بولجامدار دا بار.

بىراق، پرەزيدەنت ترامپ ءوز كەزەگىندە اكەلى-بالالى بايدەندەردى زاڭسىز ارەكەتتەرمەن ايىپتاعان. ترامپ بايدەندى قىزمەت مۇمكىندىگىنەن اسىرا پايدالانىپ، ۋكراينا قاۋىپسىزدىك قىزمەتكەرلەرىنە قىسىم ءتۇسىرىپ، ۇلىنا قارسى قىلمىستىق ءىستى كۇشپەن جاپتىرعان دەگەن ايىبىن تاعىپ وتىر.

ترامپتىڭ يمپيچمەنتى سەناتتىڭ ۇشتەن ەكى وكىلى قولداعاندا عانا جۇزەگە اسپاق. بىراق، اقش تاريحىندا بىردە ءبىر پرەزيدەنت قىزمەتىنەن قۋىلىپ كورگەن جوق. 230 جىل ىشىندە تەك ەكى پرەزيدەنتكە عانا يمپيچمەنت جاريالانعان، بىراق ولار ايىپ استىندا ءوز قىزمەتتەرىن جالعاستىرعان. كەيبىر ساراپشىلار وسىلاردى العا تارتا وتىرىپ، سونداي-اق، اقش سەناتىندا قازىرگى كەزدە رەسپۋبليكاشىلداردىڭ ۇستەمدىك قۇرىپ وتىرعانىن ەسكەرە وتىرىپ، ترامپتىڭ قىزمەتتەن قۋىلۋى مۇمكىن ەمەس دەگەن بولجام ايتادى.

“The Qazaq Times”