"Qısım köruden" täjiribesi mol azamattıq belsendi Galina Arzamasova. Foto: Arzamasovanıñ jeke paraqşasınan

Talğar audanınıñ prokuraturası azamattıq belsendi Galina Arzamasovağa jasalğan qastandıqtı «kisi öltiruge oqtalu» dep emes, jay ğana «bwzaqılıq» babımen qarastırıp jatır. Bwğan jambasınan jaralanğan japa şeguşi tarap narazı.

Keşe aydıñ-künniñ amanında äkim tapsırısımen zardap şekken belsendiniñ advokatı men qoldauşıları Adam qwqıqtarı jäne zañdılıqtıñ saqtaluı jönindegi Qazaqstan halıqaralıq byurosında arnayı baspasöz jiının ötkizdi. Advokat Nwrlan Rahmanov:

– Biz Appazovtıñ negizgi küdikti twlğasınıñ äreketterin «bwzaqılıq» babınan Qazaqstan Respublikası Qılmıstıq kodeksiniñ 99-babı 2-böligine («Kisi öltiruge oqtalu») auıstırudı swradıq. Bizdiñ ötinişimiz Almatı oblısınıñ prokuraturasına jiberilgen. Prokuratura atalğan is boyınşa tergeu bügingi künge deyin ayaqtalmağanın habarladı, eñ qızığı, olar Appazovtıñ äreketin adam öltiru äreketi dep qarauğa erterek dep sanaydı, – dedi.

Advokattıñ aytuınşa, bwl tergeu organdarı men prokuraturanıñ isti ob'ektivti tergeuge müddeli emes ekendigin körsetedi.

«Jaqında tergeu amaldarı ayaqtalıp, Talğar audandıq sotına jiberiledi. Qazir jağdayğa qarap otırıp, qılmıstıq is Appazovtıñ paydasına şeşiletinin aldın-ala añğaruğa boladı. Ökiniştisi sol, jäbir körgen belsendiniñ jeñiluimen özge de azamattıq wstanımı üşin küresetin adamdardıñ sağın sındıradı. Küşi basım tarap qwqıqtıq teñdikti qalaytındarğa osılayşa emeuirin bayqatıp meselin qaytarmaq», – dep boljadı qorğauşı.

Esteriñizde bolsa, 26 tamız talğarlıq belsendi Galina Arzamasova bir emes 6-7 ret qoqan-loqılıq körgen soñ äri Qarabwlaq auılındağı mektep aumağındağı jer mäselesine qatıstı audan äkiminiñ qabıldauına kirer kezinde «tapsırıspen» oqqa wşırağan bolatın. Äkimdik ğimaratınıñ baspaldağınan köterile bergende tu sırtınan atılğan pnevmatikalıq qarudıñ oğı süyekke tereñdey enip ketuine baylanıstı äzirge otamen de aluğa jaramaytın körinedi.

Belsendiniñ Azattıqqa bergen swhbatı boyınşa, ol Talğar audanı äkiminiñ qabıldauına Qarabwlaqtağı mektep mañındağı jerdiñ jekemenşikke berilgenin, jerdi alğan adam üy salmaq bop jatqanın aytuğa kelgen. Alğan jaraqatına qaramastan ol audan äkimine kirip, mäselelerin jetkizgen. Keyinirek auruhanağa tüsken. Osı oqiğadan soñ audandıq äkimdik Qarabwlaqtağı mektep mañındağı jerdiñ qalay satılıp ketkenin teksere bastağan.

Keyin, tamızdıñ 29-ı Qarabwlaq auılı qaraytın Panfilov auıldıq okruginiñ äkimi Nwrğali Appazov küdikti retinde wstalğan.

Baspasöz konferenciyasınıñ soñına qaray advokat  istiñ Appazovqa qatıstı jwmsaq ükimmen ayaqtaluına jol bermeu kerektigin ayttı.

«Bwl baspasöz mäslihatınıñ maqsatı – el prezidenti Toqaevqa jergilikti şeneunikter jalpığa ortaq zañdı öz ıñğayına qaray qoldanıp, azamattıq qwqıqtardı bwzuğa jol bermeu turalı ötinişimizdi jetkizu», – dep tüyindedi nauqas belsendiniñ advokatı.

Baspasöz jiını. 12 qaraşa 2019 jıl. Almatı. Foto: äleumettik jeli

"The Qazaq Times"