اكىمدىك الدىندا "اكىمنىڭ تاپسىرىسىمەن" جارالانعان بەلسەندى توقاەۆقا ۇندەۋ جولدادى

تالعار اۋدانىنىڭ پروكۋراتۋراسى ازاماتتىق بەلسەندى گالينا ارزاماسوۆاعا جاسالعان قاستاندىقتى «كىسى ولتىرۋگە وقتالۋ» دەپ ەمەس، جاي عانا «بۇزاقىلىق» بابىمەن قاراستىرىپ جاتىر. بۇعان جامباسىنان جارالانعان جاپا شەگۋشى تاراپ نارازى.

كەشە ايدىڭ-كۇننىڭ امانىندا اكىم تاپسىرىسىمەن زارداپ شەككەن بەلسەندىنىڭ ادۆوكاتى مەن قولداۋشىلارى ادام قۇقىقتارى جانە زاڭدىلىقتىڭ ساقتالۋى جونىندەگى قازاقستان حالىقارالىق بيۋروسىندا ارنايى ءباسپاسوز جيىنىن وتكىزدى. ادۆوكات نۇرلان راحمانوۆ:

– ءبىز اپپازوۆتىڭ نەگىزگى كۇدىكتى تۇلعاسىنىڭ ارەكەتتەرىن «بۇزاقىلىق» بابىنان قازاقستان رەسپۋبليكاسى قىلمىستىق كودەكسىنىڭ 99-بابى 2-بولىگىنە («كىسى ولتىرۋگە وقتالۋ») اۋىستىرۋدى سۇرادىق. ءبىزدىڭ ءوتىنىشىمىز الماتى وبلىسىنىڭ پروكۋراتۋراسىنا جىبەرىلگەن. پروكۋراتۋرا اتالعان ءىس بويىنشا تەرگەۋ بۇگىنگى كۇنگە دەيىن اياقتالماعانىن حابارلادى، ەڭ قىزىعى، ولار اپپازوۆتىڭ ارەكەتىن ادام ءولتىرۋ ارەكەتى دەپ قاراۋعا ەرتەرەك دەپ سانايدى، – دەدى.

ادۆوكاتتىڭ ايتۋىنشا، بۇل تەرگەۋ ورگاندارى مەن پروكۋراتۋرانىڭ ءىستى وبەكتيۆتى تەرگەۋگە مۇددەلى ەمەس ەكەندىگىن كورسەتەدى.

«جاقىندا تەرگەۋ امالدارى اياقتالىپ، تالعار اۋداندىق سوتىنا جىبەرىلەدى. قازىر جاعدايعا قاراپ وتىرىپ، قىلمىستىق ءىس اپپازوۆتىڭ پايداسىنا شەشىلەتىنىن الدىن-الا اڭعارۋعا بولادى. وكىنىشتىسى سول، ءجابىر كورگەن بەلسەندىنىڭ جەڭىلۋىمەن وزگە دە ازاماتتىق ۇستانىمى ءۇشىن كۇرەسەتىن ادامداردىڭ ساعىن سىندىرادى. كۇشى باسىم تاراپ قۇقىقتىق تەڭدىكتى قالايتىندارعا وسىلايشا ەمەۋىرىن بايقاتىپ مەسەلىن قايتارماق»، – دەپ بولجادى قورعاۋشى.

ەستەرىڭىزدە بولسا، 26 تامىز تالعارلىق بەلسەندى گالينا ارزاماسوۆا ءبىر ەمەس 6-7 رەت قوقان-لوقىلىق كورگەن سوڭ ءارى قارابۇلاق اۋىلىنداعى مەكتەپ اۋماعىنداعى جەر ماسەلەسىنە قاتىستى اۋدان اكىمىنىڭ قابىلداۋىنا كىرەر كەزىندە «تاپسىرىسپەن» وققا ۇشىراعان بولاتىن. اكىمدىك عيماراتىنىڭ باسپالداعىنان كوتەرىلە بەرگەندە تۋ سىرتىنان اتىلعان پنەۆماتيكالىق قارۋدىڭ وعى سۇيەككە تەرەڭدەي ەنىپ كەتۋىنە بايلانىستى ازىرگە وتامەن دە الۋعا جارامايتىن كورىنەدى.

بەلسەندىنىڭ ازاتتىققا بەرگەن سۇحباتى بويىنشا، ول تالعار اۋدانى اكىمىنىڭ قابىلداۋىنا قارابۇلاقتاعى مەكتەپ ماڭىنداعى جەردىڭ جەكەمەنشىككە بەرىلگەنىن، جەردى العان ادام ءۇي سالماق بوپ جاتقانىن ايتۋعا كەلگەن. العان جاراقاتىنا قاراماستان ول اۋدان اكىمىنە كىرىپ، ماسەلەلەرىن جەتكىزگەن. كەيىنىرەك اۋرۋحاناعا تۇسكەن. وسى وقيعادان سوڭ اۋداندىق اكىمدىك قارابۇلاقتاعى مەكتەپ ماڭىنداعى جەردىڭ قالاي ساتىلىپ كەتكەنىن تەكسەرە باستاعان.

كەيىن، تامىزدىڭ 29-ى قارابۇلاق اۋىلى قارايتىن پانفيلوۆ اۋىلدىق وكرۋگىنىڭ اكىمى نۇرعالي اپپازوۆ كۇدىكتى رەتىندە ۇستالعان.

ءباسپاسوز كونفەرەنتسياسىنىڭ سوڭىنا قاراي ادۆوكات  ىستىڭ اپپازوۆقا قاتىستى جۇمساق ۇكىممەن اياقتالۋىنا جول بەرمەۋ كەرەكتىگىن ايتتى.

«بۇل ءباسپاسوز ءماسليحاتىنىڭ ماقساتى – ەل پرەزيدەنتى توقاەۆقا جەرگىلىكتى شەنەۋنىكتەر جالپىعا ورتاق زاڭدى ءوز ىڭعايىنا قاراي قولدانىپ، ازاماتتىق قۇقىقتاردى بۇزۋعا جول بەرمەۋ تۋرالى ءوتىنىشىمىزدى جەتكىزۋ»، – دەپ تۇيىندەدى ناۋقاس بەلسەندىنىڭ ادۆوكاتى.

ءباسپاسوز جيىنى. 12 قاراشا 2019 جىل. الماتى. فوتو: الەۋمەتتىك جەلى

"The Qazaq Times"