Jwma, 15 Qaraşa 2024

Nazarbaev: Meniñ ketkenim üşin halıq qamıqqanın bilemin

Asan Anarbaywlı 12 Qaraşa, 2019 sağat 15:58

«Astana klubı» sayasi forumınıñ besinşi otırısına törağalıq etuşi N.Nazarbaev. Elorda. 12 qaraşa 2019 jıl. Foto: Sputnik / V.Vodnev

Qazaqstannıñ eks-prezidenti Nwrswltan Nazarbaev eldegi biliktiñ auısuı turalı pikir bildirip, ädetinşe 90-şı jıldarı «qwldırağan ekonomikanı» qayta küşeytu tarihınan estelikter ayttı.

Bügin astana törinde ötip jatqan «Astana klubı» sayasi forumınıñ besinşi otırısınıñ plenarlıq mäjilisinde Nazarbaev:

– Bilik tranziti turalı swraq jii qoyılıp jür. Meniñ mandatım 2020 jıldıñ soñında ayaqtaluı tiis edi, biraq men osınday şeşim qabıldadım. Nege? Oğan ne sebep boldı? Eñ aldımen, men Prezident lauazımın nağız tanımal şağımda qaldırdım. 2015 jılı saylauda men 96% dauıs jinadım. Meniñ ketkenim üşin halıq qamıqqanın bilemin. Biraq, bwl biregey oqiğa emes. Bir kezderi De Goll' de lauazımınan bas tartqan, Li Kuan YU, Mahathir mırzalar da özi ketken, – dedi Nwrswltan Nazarbaev Astana club panel'dik otırısında.

Ol keñes kezinen beri Qazaqstan basşılığında bolğanın jäne «eseñgiregen eldiñ» äl-auqatın qalay 19 esege ösirgenin ädettegidey qaytaladı. «1984 jılı meni Qazaqstan ministrleri keñesiniñ törağası etip sayladı. Sodan bergi 35 jılda – KSRO ıdırauınan keyingi auır jıldar bastan ötti, alıp memleket qiradı. Barlıq baylanıs üzildi, 2 million adam jwmıssız qaldı, elektr quatı joq, dükende nan men süt, şwjıq joq. Men Qazaqstandı osı küyinde qabıldap aldım. Bwl jıldarı el ekonomikası 20 ese köterildi, halıqtıñ äl-auqatı 19 ese östi. Biz älem kartasında bolmağan memleketti qwrdıq. Qazir bwl memleket älem kartasında bar jäne qwrmet-bedelge ie», – dedi ol.

Sonımen qatar ol 14,5 mıñ şaqırım bolatın el şekarasınıñ şegeleu tarihına toqtalıp, alpauıt derjavalar arasında «bizdiñ köpvektorlı sayasatımız eşkimniñ aumağına enbey, teñ qarım-qatınas qwruğa negizdeletinin» qaytalap ayttı.

Sarapşılar tarapı Nazarbaevtıñ ädette ärqanday twñğış prezident atqaruı tiis «bazalıq mindettemelerdi» ünemi maqtanış esebinde söz etuin «älsiz argument» dep sanap, jii sınğa aladı.