Qıtay Hunan telearnasındağı «Änşi» jobasınıñ  osı aptada toğızınşı kezeñi bolıp ötti. Bwl ret telejobada qiyan-keski bäseke orın aldı. Sebebi, joba soñğı märesine bir taban jaqındap qaldı. Bwl kezektegi tört maydan sınaq änşilerdiñ jobada qaluı men ketuin belgiledi, äri sol arqılı telejoba öresi bir satığa joğarı köterildi.

Jobadağı qıtaylıq Pıñ esimdi änşi men otandası Lyañ Bo bäsekelese öner körsetti. Bwlardıñ bäsekelese körsetken öneri toğızınşı retki «Änşi» jobasınıñ şıñı degen bağalar da berildi.

Ötken aptada densaulığına baylanıstı äriptesterine ese berip qoyğan otandasımız Dimaşqa, bwl jolı jobadağı öz märtebesin tikteuge tura keldi. Ol üşin jas änşi bar küşin salıp dayındalğanı bayqaladı. Toğızınşı aynalımğa, tereñ de quattı äuendi qajet etetin, sezimge bay klassikalıq «All by mysrlf» attı ändi taldaptı.  Bwl än Eric Carmen attı amerikalıq änşiniñ şığarmaşılığınan tuğan. Bwl än onıñ änşilik ömirindegi eñ jarqın sätteriniñ simvolı bolıp tabıladı.

Dimaştıñ orındauındağı  «All by myself» äninen keyin, qıtaylıq baspasözderdiñ biri: «22 jastağı jas änşide, mwnday tereñ sezimdi beynelep beretin quattıñ barlığı, onıñ şın talant ekenin körsetedi» dep jazıptı. Bwl ändi osınşalıq tereñ sezimde jetkizip beruiniñ qwpiyasın swrağan qıtay jurnalisterine Dimaş: «Men tıñdau arqılı muzıkalıq iirimderdi tüsinudiñ sabağınan ötkenmin. Men är ret öz jan-dünieme säykes keletin ändi taldaymın. Men sonday ruhani azıq bere alatın änderdi wnatamın», – dep jauap bergen.

“The Qazaq Times”