قىتاي حۋنان تەلەارناسىنداعى «ءانشى» جوباسىنىڭ  وسى اپتادا توعىزىنشى كەزەڭى بولىپ ءوتتى. بۇل رەت تەلەجوبادا قيان-كەسكى باسەكە ورىن الدى. سەبەبى، جوبا سوڭعى مارەسىنە ءبىر تابان جاقىنداپ قالدى. بۇل كەزەكتەگى ءتورت مايدان سىناق انشىلەردىڭ جوبادا قالۋى مەن كەتۋىن بەلگىلەدى، ءارى سول ارقىلى تەلەجوبا ورەسى ءبىر ساتىعا جوعارى كوتەرىلدى.

جوباداعى قىتايلىق پىڭ ەسىمدى ءانشى مەن وتانداسى لياڭ بو باسەكەلەسە ونەر كورسەتتى. بۇلاردىڭ باسەكەلەسە كورسەتكەن ونەرى توعىزىنشى رەتكى «ءانشى» جوباسىنىڭ شىڭى دەگەن باعالار دا بەرىلدى.

وتكەن اپتادا دەنساۋلىعىنا بايلانىستى ارىپتەستەرىنە ەسە بەرىپ قويعان وتانداسىمىز ديماشقا، بۇل جولى جوباداعى ءوز مارتەبەسىن تىكتەۋگە تۋرا كەلدى. ول ءۇشىن جاس ءانشى بار كۇشىن سالىپ دايىندالعانى بايقالادى. توعىزىنشى اينالىمعا، تەرەڭ دە قۋاتتى اۋەندى قاجەت ەتەتىن، سەزىمگە باي كلاسسيكالىق «All by mysrlf» اتتى ءاندى تالداپتى.  بۇل ءان Eric Carmen اتتى امەريكالىق ءانشىنىڭ شىعارماشىلىعىنان تۋعان. بۇل ءان ونىڭ انشىلىك ومىرىندەگى ەڭ جارقىن ساتتەرىنىڭ سيمۆولى بولىپ تابىلادى.

ديماشتىڭ ورىنداۋىنداعى  «All by myself» انىنەن كەيىن، قىتايلىق باسپاسوزدەردىڭ ءبىرى: «22 جاستاعى جاس انشىدە، مۇنداي تەرەڭ سەزىمدى بەينەلەپ بەرەتىن قۋاتتىڭ بارلىعى، ونىڭ شىن تالانت ەكەنىن كورسەتەدى» دەپ جازىپتى. بۇل ءاندى وسىنشالىق تەرەڭ سەزىمدە جەتكىزىپ بەرۋىنىڭ قۇپياسىن سۇراعان قىتاي جۋرناليستەرىنە ديماش: «مەن تىڭداۋ ارقىلى مۋزىكالىق يىرىمدەردى ءتۇسىنۋدىڭ ساباعىنان وتكەنمىن. مەن ءار رەت ءوز جان-دۇنيەمە سايكەس كەلەتىن ءاندى تالدايمىن. مەن سونداي رۋحاني ازىق بەرە الاتىن اندەردى ۇناتامىن»، – دەپ جاۋاپ بەرگەن.

“The Qazaq Times”