Ötken senbi Atırauda meningitten äskeri qızmetker köz jwmdı.

Köleñkeli twsı köp «derti bayqalmağan» ölimge qatıstı Atırau oblıstıq Densaulıq saqtau basqarması:

«26 qazan küni äskeri bölimniñ fel'dşeri äskeri qızmetşini auır jağdayda oblıstıq auruhanağa jetkizdi. Klinikalıq-zerthanalıq tekseristerdiñ jäne salalıq mamandardıñ konsul'taciyalarınan keyin nauqasqa «meningokokk infekciyasınıñ kürt asqınatın türi» degen boljaldı diagnoz qoyıldı. Nauqas jansaqtau bölimine jatqızıldı. Jürgizilgen intensivti terapiyağa qaramastan, ol 5 sağattan keyin qaytıs boldı», – dep mälimdedi.

Bizge belgili bolğan mälimet boyınşa, sarbaz medicinalıq qızmetke 26 qazan küni jügingen. Al Wlttıq qauipsizdik komitetiniñ Atırau qalasındağı «2016 äskeri böliminiñ» sarbazı, marqwm äskeri bölimge 16 qazan küni kelgen desedi.

«Densaulıq saqtau basqarması oqiğanıñ anıq-qanığın tekseru üşin komissiya qwrdı. 27 qazan küni äskeri bölimde epidemiyağa qarsı, aldın alu şaraları ötkizildi – nauqaspen qarım-qatınasta bolğandardıñ barlığın däriger qarap şıqtı, antibiotikoprofilaktika bastaldı. Baylanısta bolğandardıñ arasında meningokokk infekciyasın jwqtıru belgileri bar twlğalar anıqtalğan joq. Medicinalıq baqılau jalğasuda», – deydi basqarma ökilderi.

Äskeri bölimge keletin kez kelgen sarbaz keşendi medicinalıq baqılau komissiyasınıñ tekseruinen ötetinin eskersek, bwğan qalay jol bergenin sau espen tüsinip jetu qiın. Qazannıñ ortası men aradağı on künde belgili bolmay, däm-twzı tausıluına bes sağat qalğanda ğana anıqtalatınday ne dert bwl, mwnı añğarmaytın äskeri bölimniñ därigerleri men äskeri nısanğa joldama bergen medicinalıq komissiyanıñ käsibi biliktiligine kümändanbasqa laj joq. Äkeden wlın, ağadan inisin, qarındastan ağasın ayırğan qayğılı oqiğa Atıraudağı densaulıq saqtau salasına qatıstı birinşi jağday emes. Qoğamdıq rezonansqa deyin wlasatın medicinalıq mekemelerdegi daudıñ köptigi sonşalıq,  äzirge bireuiniñ basın qayırıp, nükte qoyatın türi joq. Mäsele sozılmalı äri tereñ sipat alğan.

Qarapayım ğana äskeriniñ, jay emes WQK sarbazınıñ beybit kündegi densaulığın baqılap, der kezinde şara qoldanuğa jaramağan qorğanıs salasınıñ «kemeldigi men beriktigine» de küdik tuadı. Aşıqtıq, jauapkerşilik jäne sıni közqaras joq jerde «tüsiniksiz» jayttar köbeyedi.

"The Qazaq Times"