كورنەكى سۋرەت. فوتو: اشىق دەرەككوز

وتكەن سەنبى اتىراۋدا مەنينگيتتەن اسكەري قىزمەتكەر كوز جۇمدى.

كولەڭكەلى تۇسى كوپ «دەرتى بايقالماعان» ولىمگە قاتىستى اتىراۋ وبلىستىق دەنساۋلىق ساقتاۋ باسقارماسى:

«26 قازان كۇنى اسكەري ءبولىمنىڭ فەلدشەرى اسكەري قىزمەتشىنى اۋىر جاعدايدا وبلىستىق اۋرۋحاناعا جەتكىزدى. كلينيكالىق-زەرتحانالىق تەكسەرىستەردىڭ جانە سالالىق مامانداردىڭ كونسۋلتاتسيالارىنان كەيىن ناۋقاسقا «مەنينگوكوكك ينفەكتسياسىنىڭ كۇرت اسقىناتىن ءتۇرى» دەگەن بولجالدى دياگنوز قويىلدى. ناۋقاس جانساقتاۋ بولىمىنە جاتقىزىلدى. جۇرگىزىلگەن ينتەنسيۆتى تەراپياعا قاراماستان، ول 5 ساعاتتان كەيىن قايتىس بولدى»، – دەپ مالىمدەدى.

بىزگە بەلگىلى بولعان مالىمەت بويىنشا، سارباز مەديتسينالىق قىزمەتكە 26 قازان كۇنى جۇگىنگەن. ال ۇلتتىق قاۋىپسىزدىك كوميتەتىنىڭ اتىراۋ قالاسىنداعى «2016 اسكەري ءبولىمىنىڭ» ساربازى، مارقۇم اسكەري بولىمگە 16 قازان كۇنى كەلگەن دەسەدى.

«دەنساۋلىق ساقتاۋ باسقارماسى وقيعانىڭ انىق-قانىعىن تەكسەرۋ ءۇشىن كوميسسيا قۇردى. 27 قازان كۇنى اسكەري بولىمدە ەپيدەمياعا قارسى، الدىن الۋ شارالارى وتكىزىلدى – ناۋقاسپەن قارىم-قاتىناستا بولعانداردىڭ بارلىعىن دارىگەر قاراپ شىقتى، انتيبيوتيكوپروفيلاكتيكا باستالدى. بايلانىستا بولعانداردىڭ اراسىندا مەنينگوكوكك ينفەكتسياسىن جۇقتىرۋ بەلگىلەرى بار تۇلعالار انىقتالعان جوق. مەديتسينالىق باقىلاۋ جالعاسۋدا»، – دەيدى باسقارما وكىلدەرى.

اسكەري بولىمگە كەلەتىن كەز كەلگەن سارباز كەشەندى مەديتسينالىق باقىلاۋ كوميسسياسىنىڭ تەكسەرۋىنەن وتەتىنىن ەسكەرسەك، بۇعان قالاي جول بەرگەنىن ساۋ ەسپەن ءتۇسىنىپ جەتۋ قيىن. قازاننىڭ ورتاسى مەن اراداعى ون كۇندە بەلگىلى بولماي، ءدام-تۇزى تاۋسىلۋىنا بەس ساعات قالعاندا عانا انىقتالاتىنداي نە دەرت بۇل، مۇنى اڭعارمايتىن اسكەري ءبولىمنىڭ دارىگەرلەرى مەن اسكەري نىسانعا جولداما بەرگەن مەديتسينالىق كوميسسيانىڭ كاسىبي بىلىكتىلىگىنە كۇماندانباسقا لاج جوق. اكەدەن ۇلىن، اعادان ءىنىسىن، قارىنداستان اعاسىن ايىرعان قايعىلى وقيعا اتىراۋداعى دەنساۋلىق ساقتاۋ سالاسىنا قاتىستى ءبىرىنشى جاعداي ەمەس. قوعامدىق رەزونانسقا دەيىن ۇلاساتىن مەديتسينالىق مەكەمەلەردەگى داۋدىڭ كوپتىگى سونشالىق،  ازىرگە بىرەۋىنىڭ باسىن قايىرىپ، نۇكتە قوياتىن ءتۇرى جوق. ماسەلە سوزىلمالى ءارى تەرەڭ سيپات العان.

قاراپايىم عانا اسكەرىنىڭ، جاي ەمەس ۇقك ساربازىنىڭ بەيبىت كۇندەگى دەنساۋلىعىن باقىلاپ، دەر كەزىندە شارا قولدانۋعا جاراماعان قورعانىس سالاسىنىڭ «كەمەلدىگى مەن بەرىكتىگىنە» دە كۇدىك تۋادى. اشىقتىق، جاۋاپكەرشىلىك جانە سىني كوزقاراس جوق جەردە «تۇسىنىكسىز» جايتتار كوبەيەدى.

"The Qazaq Times"