Rejep Tayıp Erdoğan. Foto: NL Times

Türik sırtqı ister ministri Europanı qarañğı tün kütip twr dep qorqıttı.

Türkiya sırtqı ister ministri Mevlut Çavuşoglu Niderlandiyadağı saylau dayındıqtarı boyınşa pikir bildire kelip, Europanı tayauda jaña «qaqtığıs» kütip twrğanın aytıp qorqıttı. Bwl turalı BBC-diñ resmi saytı habarlap otır.

Türkiya sırtqı ister ministri saylauşılarmen kezdesu barısında: « Olar jüzdegen jıldar boyı soğısıp keldi, olar türli senimdi wstanğandıqtan bir-birin qırğındap keldi. Olar bwdan sabaq alıp Europalıq Odaq deytin wyım qwrdı. Alayda, qazir onı da  talqandağalı otır. Demek, Europanı qarañğı tün ğana kütip twr», – degen pikirin ayttı.

Türkiya Niderlandiyamen diplomatiyalıq baylanıstarın toqtattı.

Türkiya prezidenti Rejep Tayıp Erdoğan Europa sotınıñ hidjab turalı şeşimin sınğa aldı. Osıdan bwrın Europa sotı jwmıs beruşi kompaniyalar jağdayğa qarap, hidjab kietin qızmetkerlerge tiım sala aladı dep şeşim qabıldağan. Türkiya prezidenti bwl turalı: « Nağız wyat! Sizderdiñ europalıq principteriñizge bağalau jäne ädilettilikti jaqtau keregi joqtay. Sizder krest pen jartı aydı (hristian men islam) alğaş qaqtığıstırğansızdar», – dedi.

Bwl söz türik basşısınıñ Konstituciya referendumın qoldauşılardı özine tartu üşin aytqanı deuge boladı. Ol Europadağı qoğamdıq tüzimderdiñ äserine köp wşırap jürgen mwsılmandardı özine tartu arqılı, aldağı referendumda özi oylağan nätijeni qolğa keltirgeli otır. Erdoğan biligi referendum arqılı Türkiya biligin parlamenttik bilikten, prezidenttik bilikke auıstırğalı otır. Bwğan Europadağı qarsı nauqanda negizgi üş mäsele bar.

Birinşi. Europalıq jetekşilerdiñ Türkiyağa qarata adamdıq qwqıq, demokratiya jäne zañdılıqtar turasındağı sın-pikirleri men talaptarına jol beruin talap etedi. Bwl basqaşa aytqanda Europadağı demokratiyanıñ solğındap bara jatqanın tüsindiredi. Bwnıñ anıq däleli retinde özindik islamofobiyası men äsire oñşıl partiyalardıñ qalıptasıp, damıp jatqandığın aytuğa boladı. Onı türik sırtqı ister ministriniñ sözinen de anıq añğaruğa boladı. Al Europa ökilderi Türkiyanı sınğa alğanımen özderiniñ qwndılıqtarın jaqtauda, antimigraciyalıq, antiislamşıldıq qoğamdıq pikirlerin jasıra almaydı.

Ekinşi. Erdoğan men Çavuşogludıñ «Olar bizge qarsı» dep wran saluı, öz qatarlastarınıñ sanın köbeytuge qam qılıp jatqandağısı.

Üşinşi. Türik saylauşılarına «Türkiya quattı memleket, Europamen egerlese aladı» degendi wğındırğısı keledi.

Bwdan bwrın da, mwnday äreketter Erdoğannıñ jaqtastarın köbeytuge kömektesken bolatın. Sondıqtan da 16 säuirde ötetin referendumğa deyin, Batıs elderine qarsı türik sayasatkerleriniñ  mälimdemeleri men qitwrqı sözderi tolastay qoymaydı. Türkiyadağı referendum ötip, öz degenderine jeter bolsa, türik biligi Europamen qatınastardı qayta rettep aları dausız. Sebebi, Europa Türkiya ekonomikasındağı eñ negizgi äriptesi. Türkiya üşin Europa bazarınan bas tartu özin toqırauğa itergenmen birdey.

“The Qazaq Times”