Venesuela prezidenti Nikolas Maduro jäne Resey basşısı Vladimir Putin. Foto: https://myagkayasila

Venesuela prezidenti Nikolas Maduro Latın Amerikasınıñ halqımen ıntımaqtastıq ornatqanı üşin Reseyge alğıs bildirdi.

«Resey jahandıq köşbasşılığımen batıl qoldau körsetti. Men Reseyge jäne onıñ halqına alğıs aytamın. Biz Mäskeude, sonday-aq türli halıqaralıq alañdarda birneşe kezdesu ötkizdik. Ekijaqtı qarım-qatınastardı damıtu boyınşa ünemi hat almasıp, telefon arqılı söylesemiz. Aldağı künderi qarım-qatınasımızdı odan äri ilgeriletetin bolamız», – dedi ol. Sonımen qatar, Maduro Resey prezidenti Vladimir Putinmen twraqtı baylanısta ekenin ayttı.

Älem elderi üşin «diktator basşı» atanğan Nikolas Maduro men «agressiyalıq sayasat» wstanatın Vladimir Putin arasındağı baylanıstıñ nığayuınan Qwrama Ştattarı, Europalıq odaq memleketteri seziktene bastağan. Sebebi, Venesueladağı bir jılğa sozılğan dağdarıstıñ artında qazirgi prezident pen Resey qarım-qatınasınıñ qatısı bar degen twjırımdar aytılğan. Karakasta ötken birneşe halıq tolquları kezinde Mäskeu öz äskerin sol aymaqqa jibergen bolatın. Mwnımen qatar, Resey prezidentiniñ baspasöz hatşısı Dmitriy Peskov Venesuela prezidenti jaqın arada Putinmen kezdesetinin habarladı.

23 qañtarda Joğarğı Sot joyılğannan keyin Venesueladağı jağday şielenisip ketken. Sol uaqıtta Wlttıq assambleya baqılauındağı oppoziciyanı basqarğan Huan Guaydo özin ükimet basşısı retinde jariyalağan. Oğan AQŞ-pen qosa alğanda 50-den astam memleket qoldau körsetti. Europalıq odaq Guaydonı eldiñ legitimdi basşısı retinde tanıdı. Al Qıtay men Resey biligi qazirgi prezident Nikolas Maduro ükimetine senim bildirip, AQŞ jäne Europa elderiniñ Venesuela oppoziciyasına qoldau bildiruin «halıqaralıq qwqıqbwzuşılıq» dep atağan.

"The Qazaq Times"