ۆەنەسۋەلا پرەزيدەنتى نيكولاس مادۋرو جانە رەسەي باسشىسى ۆلاديمير پۋتين. فوتو: https://myagkayasila

ۆەنەسۋەلا پرەزيدەنتى نيكولاس مادۋرو لاتىن امەريكاسىنىڭ حالقىمەن ىنتىماقتاستىق ورناتقانى ءۇشىن رەسەيگە العىس ءبىلدىردى.

«رەسەي جاھاندىق كوشباسشىلىعىمەن باتىل قولداۋ كورسەتتى. مەن رەسەيگە جانە ونىڭ حالقىنا العىس ايتامىن. ءبىز ماسكەۋدە، سونداي-اق ءتۇرلى حالىقارالىق الاڭداردا بىرنەشە كەزدەسۋ وتكىزدىك. ەكىجاقتى قارىم-قاتىناستاردى دامىتۋ بويىنشا ۇنەمى حات الماسىپ، تەلەفون ارقىلى سويلەسەمىز. الداعى كۇندەرى قارىم-قاتىناسىمىزدى ودان ءارى ىلگەرىلەتەتىن بولامىز»، – دەدى ول. سونىمەن قاتار، مادۋرو رەسەي پرەزيدەنتى ۆلاديمير پۋتينمەن تۇراقتى بايلانىستا ەكەنىن ايتتى.

الەم ەلدەرى ءۇشىن «ديكتاتور باسشى» اتانعان نيكولاس مادۋرو مەن «اگرەسسيالىق ساياسات» ۇستاناتىن ۆلاديمير پۋتين اراسىنداعى بايلانىستىڭ نىعايۋىنان قۇراما شتاتتارى، ەۋروپالىق وداق مەملەكەتتەرى سەزىكتەنە باستاعان. سەبەبى، ۆەنەسۋەلاداعى ءبىر جىلعا سوزىلعان داعدارىستىڭ ارتىندا قازىرگى پرەزيدەنت پەن رەسەي قارىم-قاتىناسىنىڭ قاتىسى بار دەگەن تۇجىرىمدار ايتىلعان. كاراكاستا وتكەن بىرنەشە حالىق تولقۋلارى كەزىندە ماسكەۋ ءوز اسكەرىن سول ايماققا جىبەرگەن بولاتىن. مۇنىمەن قاتار، رەسەي پرەزيدەنتىنىڭ ءباسپاسوز حاتشىسى دميتري پەسكوۆ ۆەنەسۋەلا پرەزيدەنتى جاقىن ارادا پۋتينمەن كەزدەسەتىنىن حابارلادى.

23 قاڭتاردا جوعارعى سوت جويىلعاننان كەيىن ۆەنەسۋەلاداعى جاعداي شيەلەنىسىپ كەتكەن. سول ۋاقىتتا ۇلتتىق اسسامبلەيا باقىلاۋىنداعى وپپوزيتسيانى باسقارعان حۋان گۋايدو ءوزىن ۇكىمەت باسشىسى رەتىندە جاريالاعان. وعان اقش-پەن قوسا العاندا 50-دەن استام مەملەكەت قولداۋ كورسەتتى. ەۋروپالىق وداق گۋايدونى ەلدىڭ لەگيتيمدى باسشىسى رەتىندە تانىدى. ال قىتاي مەن رەسەي بيلىگى قازىرگى پرەزيدەنت نيكولاس مادۋرو ۇكىمەتىنە سەنىم ءبىلدىرىپ، اقش جانە ەۋروپا ەلدەرىنىڭ ۆەنەسۋەلا وپپوزيتسياسىنا قولداۋ ءبىلدىرۋىن «حالىقارالىق قۇقىقبۇزۋشىلىق» دەپ اتاعان.

"The Qazaq Times"