Ündistan ükimeti Kaşmir aymağın avtonomiya statusınan ayırğannan beri 6 apta ötti. Aymaqtağı jağday äli de dağdarıs küyinde twr. Mıñdağan adam ükimetke qarsı äreketterge bardı degen ayıp pen qamaldı, onıñ arasında keybir sayasi liderler de bar. On mıñdağan qarulı jasaq qatañ baqılauğa alğan aymaqta wyalı baylanıs pen ğalamtor jelisi de toqtatılğan.

Aymaqtıñ avtonomiya qwqığınıñ alınuına qarsı narazılıq şaraları qaqtığıstarğa wlasqan. Ükimet pen qauipsizdik küşterine qarsı şıqqan ereuilşiler arasında qaqtığıstar orın alğanın jergilikti jäne şeteldik aqparat qwraldarı habarlauda. Alayda, qanşa adamnıñ qaza tapqanı nemese zardap şekkeni turalı anıq mälimet joq. Zardap şekkender turalı bar mälimetter de ärtürli.

Ündistan ükimeti qauipsizdik küşteriniñ operaciyası kezinde birde bir adam qaza bolmağanı turalı mälimet bergen. Alayda, BBC tilşileri aymaqtıñ jağdayın köruge barğanda qaqtığıstarda qaza tapqan birneşe adamnıñ janazasına kuä bolğan. Jergilikti twrğındar üş adamnıñ qaza tapqanın aytadı. Onıñ birin dükeninde Ündistan qarulı äskerleri äyeliniñ közinşe atıp öltirgen.

Öñirdegi beybit twrğındar qarulı toptar men qauipsizdik küşteriniñ ortasında qalğan. Keybir öñirdiñ twrğındarı ündistandıq qauipsizdik qızmetkerleriniñ köbirek ürey äkelip jatqanın, olar balalardı da zañsız qamauğa alıp jatqanın aytadı.

Sarapşılar aymaqtağı qatañ baqılaudıñ 6 aptağa jetkenin, baqılau qanşalıq wzaqqa sozılsa jäne qatañ bolsa qarsılıqtıñ da sonşalıqtı küşeyetinin aytadı.

“The Qazaq Times”