ءۇندىستان ۇكىمەتى كاشمير ايماعىن اۆتونوميا ستاتۋسىنان ايىرعاننان بەرى 6 اپتا ءوتتى. ايماقتاعى جاعداي ءالى دە داعدارىس كۇيىندە تۇر. مىڭداعان ادام ۇكىمەتكە قارسى ارەكەتتەرگە باردى دەگەن ايىپ پەن قامالدى، ونىڭ اراسىندا كەيبىر ساياسي ليدەرلەر دە بار. ون مىڭداعان قارۋلى جاساق قاتاڭ باقىلاۋعا العان ايماقتا ۇيالى بايلانىس پەن عالامتور جەلىسى دە توقتاتىلعان.

ايماقتىڭ اۆتونوميا قۇقىعىنىڭ الىنۋىنا قارسى نارازىلىق شارالارى قاقتىعىستارعا ۇلاسقان. ۇكىمەت پەن قاۋىپسىزدىك كۇشتەرىنە قارسى شىققان ەرەۋىلشىلەر اراسىندا قاقتىعىستار ورىن العانىن جەرگىلىكتى جانە شەتەلدىك اقپارات قۇرالدارى حابارلاۋدا. الايدا، قانشا ادامنىڭ قازا تاپقانى نەمەسە زارداپ شەككەنى تۋرالى انىق مالىمەت جوق. زارداپ شەككەندەر تۋرالى بار مالىمەتتەر دە ءارتۇرلى.

ءۇندىستان ۇكىمەتى قاۋىپسىزدىك كۇشتەرىنىڭ وپەراتسياسى كەزىندە بىردە ءبىر ادام قازا بولماعانى تۋرالى مالىمەت بەرگەن. الايدا، BBC تىلشىلەرى ايماقتىڭ جاعدايىن كورۋگە بارعاندا قاقتىعىستاردا قازا تاپقان بىرنەشە ادامنىڭ جانازاسىنا كۋا بولعان. جەرگىلىكتى تۇرعىندار ءۇش ادامنىڭ قازا تاپقانىن ايتادى. ونىڭ ءبىرىن دۇكەنىندە ءۇندىستان قارۋلى اسكەرلەرى ايەلىنىڭ كوزىنشە اتىپ ولتىرگەن.

وڭىردەگى بەيبىت تۇرعىندار قارۋلى توپتار مەن قاۋىپسىزدىك كۇشتەرىنىڭ ورتاسىندا قالعان. كەيبىر ءوڭىردىڭ تۇرعىندارى ۇندىستاندىق قاۋىپسىزدىك قىزمەتكەرلەرىنىڭ كوبىرەك ۇرەي اكەلىپ جاتقانىن، ولار بالالاردى دا زاڭسىز قاماۋعا الىپ جاتقانىن ايتادى.

ساراپشىلار ايماقتاعى قاتاڭ باقىلاۋدىڭ 6 اپتاعا جەتكەنىن، باقىلاۋ قانشالىق ۇزاققا سوزىلسا جانە قاتاڭ بولسا قارسىلىقتىڭ دا سونشالىقتى كۇشەيەتىنىن ايتادى.

“The Qazaq Times”