Boltonnıñ Aq üyden ketui Soltüstik Koreyanı quanttı. Foto: The Intercept

AQŞ prezidenti Donal'd Tramp jıl soñına deyin Soltüstik Koreya basşısı Kim Joñ Unmen törtinşi kezdesuin ötkizui mümkin ekenin mälimdedi. Eki el basşısı bıltır mausım ayınan beri 3 ret kezdesken bolatın. Soğan qaramastan Uaşington men Pioñyañ (Phen'yan) arasındağı beybitşilik kelissöz nätijesiz boldı. Korey tübegindegi jağdaydı baqılap otırğan sarapşılar kelissözderdiñ tım wzaqqa sozılıp jatqanınan alañdaydı.

«Biz de, olar da kezdesudi qalaydı. Menşe bwl äbden mümkin», – dedi Tramp mälimdemesinde.

Oñtüstik Koreya aqparat qwraldarınıñ habarına qarağanda, Soltüstik Koreya osı aydıñ soñına deyin jwmıs deñgeyindegi kelissözder jürgizu turalı wsınıs jasağan. Bwl kelissözderdiñ qayta jandanuına degen ümitti arttıradı deydi oñtüstik koreyalıq BAQ.

Al, Aq üydiñ bwrınğı wlttıq qauipsizdik jönindegi keñesşisi Dennis Uaylder AQŞ pen Soltüstik Koreya arasındağı kelissözdiñ qayta qozğaluı Tramptıñ wlttıq qauipsizdik jönindegi keñesşisi Boltonnıñ qızmetten ketuimen qatıstı degen pikirin aytadı. «Meniñ oyımşa, soltüstik koreyalıq rejim Boltonnıñ Aq üyden ketkenine quandı. Bolton prezidenttiñ Soltüstik Koreya sayasatına kelispegen siyaqtı», – deydi Uaylder.

Bolton Soltüstik Koreyanı yadrolıq qarusızdandıruda «Liviya ülgisin» qoldanudı quattap kelgen. Liviyanıñ bwrınğı lideri Kaddafi yadrolıq qaruınan bas tarttı. Alayda, AQŞ qoldauındağı köterilisşiler onı «it tepkige salıp» öltirdi. Bwl AQŞ-tıñ halıqaralıq arenadağı naşar ıqpalın küşeytti. Tramp Boltonnıñ bwl oyına kelispegen. «Sizdiñ jobañızdıñ nätijesin bilu üşin Kaddafi isiniñ soñına qarau jetkilikti. Bwl jaqsı twjırım emes, bwl twjırım bizdi tek qana artqa qaray jıljıtadı», – degen Tramp öziniñ keñesşisine.

Aq üydiñ wlttıq qauipsizdik jönindegi bwrınğı keñesşisi bwl turalı pikirinde: «Kaddafidiñ soñğı tağdırı – bwl liderler tarihındağı eñ jamanı. Ol azaptaldı jäne öltirildi. Eger de biz, Soltüstik Koreya mäselesin Kaddafi jolımen şeşetin bolsaq, bwl Soltüstik Koreyanıñ özin de jiirkendiredi», – degen Uaylder

Alayda, Boltonnıñ Aq üyden ketui men AQŞ-KHDR kelissöziniñ jandana qoyuı ekitalay. Sebebi, Soltüstik Koreya osı aptada mamır ayınan bergi 10-şı zımıran sınağın ötkizdi jäne AQŞ-qa qarata qısımdı arttırıp keledi.

AQŞ Memlekettik departamenti Pioñyanıñ bwl äreketine bergen jauabında: «Zımıran sınağı kömektespeydi. Kerisinşe, Soltüstik Koreya kelissöz üsteline oraluı kerek», – delingen.

Degenmen, AQŞ pen Soltüstik Koerya basşılarınıñ kezdesui formağa aynalıp bara jatır. Osığan baylanıstı älem aqparat keñistiginde: «Tramp pen Kim kezdesip qol alısıp qana qoymay, kelissözdiñ nätijesine ie bolu üşin anağwrlım mazmwndı kelissözder tüzuge kömektesetin yadrolıq şarapşılar kerek», – degen pikirler köbeygen.

“The Qazaq Times”