Wlıbritaniya prem'er-ministri Boris Djonson. Foto: https://1.bp.blogspot.com

Wlıbritaniyanıñ Europalıq odaq qwramınan mämilesiz şığuı elge azıq-tülik, däri-därmek, otın tapşılığın tuğızıp, şekaradağı qaqtığıstar men jappay narazılıqtarğa wlasuı mümkin. Bwl turalı Birikken Korol'dik Ministrler kabinetininiñ Brexit-ke dayındıq josparında aytılğan.

Yellowhammer dep atalatın bes bettik jospardıñ egjey-tegjeyin ötken aydıñ soñında The Times gazeti jariyalağan bolatın. Basılımdağı saraptamada atalğan josparğa «eñ sätsiz qwjat» degen bağa berilgen. Ministrler kabineti wsınğan qwjatt: «Jaña önimderdiñ keybir türlerine qoljetimdilik azayadı. Däri-därmek tapşılığı payda boladı»,– delingen.

Sonday-aq, Britaniya ükimeti EO-dan mämilesiz şığu jük kölikteriniñ La-Manşta kidiruine äkep soğuı mümkin dep qauiptenip otır. Bwl öz kezeginde porttar men äuejaylar arqılı elden ketetin jolauşılarğa da qiınğa soqpaq. Qazirdiñ özinde biletter bağası qwbılmalı bolıp twr.

Qwjatta aldağı uaqıtta Euroodaqsız kün köretin memleket üşin orın aluı mümkin tärtipsizdikterge qatıstı bılay delingen: «Bwl şeşimge qarsılıq akciyaları, narazılıqtar bükil Wlıbritaniya aumağın qamtidı jäne jergilikti twrğındar policiyamen qaqtığısadı. Sonday-aq, qoğamdıq tärtipsizdik pen qoğamdağı şielenistiñ artuı mümkin».

Osılayşa, Birikken Korol'dik odaq qwramınan eş mämilesiz şıqqan jağdayda orın alatın qiındıqtardı aldın-ala boljap, dayındıq jürgizude. Qauımdar Palatası prem'er-ministr Boris Djonsonnıñ kezekten tıs parlamenttik saylau ötkizu turalı şeşimine qarsı bolğandıqtan, Britaniyanıñ Brexit kelisimi tağı şegerilui mümkin.

Brexit kelisimi men Boris Djonsonğa qarsı ötken narazılıq akciyası.

Wlıbritaniya EO-dan biıl 29 naurızda, yağni qauımdastıqtan şığu turalı jazbaşa habarlama berilgennen keyin eki jıl ötken soñ ketui kerek edi. Alayda britan Parlamenti Qauımdar palatasınıñ deputattarı Bryussel' men bwrınğı prem'er-ministr Tereza Mey ükimeti arasında qol jetkizilgen Brexit şarttarı turalı kelisimniñ jobasın üş ret keri qaytarğan. Nätijesinde Europalıq odaq Brexit-ti aldımen säuir nemese mamırğa, sodan keyin 31 qazanğa bekituge kelisti. Sanaulı jdıldar işinde birneşe qiındıqqa tap bolğan Mey ükimetti tığırıqtan şığara almay, otstavkağa ketuge mäjbür boldı.

Onıñ ornına kelgen Boris Djonson Wlıbritaniyanıñ Brexit kelisimin 31 qazanğa bekitti. Degenmen, oppoziciyalıq partiyalar men basqaruşı Konservativti partiya deputattarınıñ qoldauımen Brexit-ti üş ayğa keyinge qaldırudı talap etetin jäne kelisimsiz şığuğa tıyım salatın zañ qabıldandı.

"The Qazaq Times"