ۇلىبريتانيا پرەمەر-ءمينيسترى بوريس دجونسون. فوتو: https://1.bp.blogspot.coم

ۇلىبريتانيانىڭ ەۋروپالىق وداق قۇرامىنان مامىلەسىز شىعۋى ەلگە ازىق-تۇلىك، ءدارى-دارمەك، وتىن تاپشىلىعىن تۋعىزىپ، شەكاراداعى قاقتىعىستار مەن جاپپاي نارازىلىقتارعا ۇلاسۋى مۇمكىن. بۇل تۋرالى بىرىككەن كورولدىك مينيسترلەر كابينەتىنىنىڭ Brexit-كە دايىندىق جوسپارىندا ايتىلعان.

Yellowhammer دەپ اتالاتىن بەس بەتتىك جوسپاردىڭ ەگجەي-تەگجەيىن وتكەن ايدىڭ سوڭىندا The Times گازەتى جاريالاعان بولاتىن. باسىلىمداعى ساراپتامادا اتالعان جوسپارعا «ەڭ ءساتسىز قۇجات» دەگەن باعا بەرىلگەن. مينيسترلەر كابينەتى ۇسىنعان قۇجاتت: «جاڭا ونىمدەردىڭ كەيبىر تۇرلەرىنە قولجەتىمدىلىك ازايادى. ءدارى-دارمەك تاپشىلىعى پايدا بولادى»،– دەلىنگەن.

سونداي-اق، بريتانيا ۇكىمەتى ەو-دان مامىلەسىز شىعۋ جۇك كولىكتەرىنىڭ لا-مانشتا كىدىرۋىنە اكەپ سوعۋى مۇمكىن دەپ قاۋىپتەنىپ وتىر. بۇل ءوز كەزەگىندە پورتتار مەن اۋەجايلار ارقىلى ەلدەن كەتەتىن جولاۋشىلارعا دا قيىنعا سوقپاق. قازىردىڭ وزىندە بيلەتتەر باعاسى قۇبىلمالى بولىپ تۇر.

قۇجاتتا الداعى ۋاقىتتا ەۋرووداقسىز كۇن كورەتىن مەملەكەت ءۇشىن ورىن الۋى مۇمكىن تارتىپسىزدىكتەرگە قاتىستى بىلاي دەلىنگەن: «بۇل شەشىمگە قارسىلىق اكتسيالارى، نارازىلىقتار بۇكىل ۇلىبريتانيا اۋماعىن قامتيدى جانە جەرگىلىكتى تۇرعىندار پوليتسيامەن قاقتىعىسادى. سونداي-اق، قوعامدىق تارتىپسىزدىك پەن قوعامداعى شيەلەنىستىڭ ارتۋى مۇمكىن».

وسىلايشا، بىرىككەن كورولدىك وداق قۇرامىنان ەش مامىلەسىز شىققان جاعدايدا ورىن الاتىن قيىندىقتاردى الدىن-الا بولجاپ، دايىندىق جۇرگىزۋدە. قاۋىمدار پالاتاسى پرەمەر-مينيستر بوريس دجونسوننىڭ كەزەكتەن تىس پارلامەنتتىك سايلاۋ وتكىزۋ تۋرالى شەشىمىنە قارسى بولعاندىقتان، بريتانيانىڭ Brexit كەلىسىمى تاعى شەگەرىلۋى مۇمكىن.

Brexit كەلىسىمى مەن بوريس دجونسونعا قارسى وتكەن نارازىلىق اكتسياسى.

ۇلىبريتانيا ەو-دان بيىل 29 ناۋرىزدا، ياعني قاۋىمداستىقتان شىعۋ تۋرالى جازباشا حابارلاما بەرىلگەننەن كەيىن ەكى جىل وتكەن سوڭ كەتۋى كەرەك ەدى. الايدا بريتان پارلامەنتى قاۋىمدار پالاتاسىنىڭ دەپۋتاتتارى بريۋسسەل مەن بۇرىنعى پرەمەر-مينيستر تەرەزا مەي ۇكىمەتى اراسىندا قول جەتكىزىلگەن Brexit شارتتارى تۋرالى كەلىسىمنىڭ جوباسىن ءۇش رەت كەرى قايتارعان. ناتيجەسىندە ەۋروپالىق وداق Brexit-ءتى الدىمەن ءساۋىر نەمەسە مامىرعا، سودان كەيىن 31 قازانعا بەكىتۋگە كەلىستى. ساناۋلى جدىلدار ىشىندە بىرنەشە قيىندىققا تاپ بولعان مەي ۇكىمەتتى تىعىرىقتان شىعارا الماي، وتستاۆكاعا كەتۋگە ءماجبۇر بولدى.

ونىڭ ورنىنا كەلگەن بوريس دجونسون ۇلىبريتانيانىڭ Brexit كەلىسىمىن 31 قازانعا بەكىتتى. دەگەنمەن، وپپوزيتسيالىق پارتيالار مەن باسقارۋشى كونسەرۆاتيۆتى پارتيا دەپۋتاتتارىنىڭ قولداۋىمەن Brexit-ءتى ءۇش ايعا كەيىنگە قالدىرۋدى تالاپ ەتەتىن جانە كەلىسىمسىز شىعۋعا تىيىم سالاتىن زاڭ قابىلداندى.

"The Qazaq Times"