AQŞ-tıñ Reseydegi tıñşısın elden jasırın alıp ketkeni ras pa?

Amerikalıq CNN arnası öziniñ aqparat közderine silteme jasay otırıp, AQŞ-tıñ barlau qızmeti 2017 jılı öziniñ Resey ükimetinde istegen tıñşısın elden jasırın alıp  ketkeni turalı jazdı. Telearnanıñ aytuınşa, AQŞ arnayı qızmetiniñ Reseydegi tıñşısın elden alıp ketuine Donal'd Tramp administraciyasınıñ jasırın mälimettermen jwmıs isteudegi olaqtığı sebep bolğan. Barlau qızmeti öz tıñşısınıñ aşıqqa şığıp qaluınan alañdağan.

Habarda aytıluınşa, Reseydegi tıñşını alıp ketu turalı şeşim 2017 jılı mamır ayında prezident Tramptıñ Resey SİM basşısı Sergey Lavrov jäne orıs elşisi Sergey Kislyakpen Aq üydegi kezdesuinen keyin qabıl alınğan. Telearnanıñ boljauınşa, sol retki kezdesude, prezident Tramp jäne onıñ adminstraciyası arnayı qızmet jetekşiligine ıñğaysızdıq tudırğan birqatar oğaş äreketterge jol bergen. Osıdan keyin barlau qızmeti öziniñ Reseydegi tıñşısınıñ qauipsizdiginen alañday bastağan.

CNN-niñ aqparat közi bergen mälimetke qarağanda, Reseydegi tıñşı turalı AQŞ ükimeti men arnayı qızmetinde tek sanaulı adamdar ğana bilgen. Sonday-aq, onıñ bergen qwpiya mälimetteri asa qwndı bolıp, onıñ ornına balama agent mülde joq bolğan.

Biraq, atalğan habardı taratqanı üşin CNN arnası AQŞ ükimeti men Ortalıq barlau agenttigi (CIA nemese OBA) jağınan sınğa da wşırauda. Ortalıq barlau agenttiginiñ ökili Britanni Bramell atalğan mälimette joqqa şığardı jäne onı jañılısqa alıp keletin jalğan mälimet dep bağaladı. Aq üy de bwl turalı mälimdeme jasap: «Bwl aqparat jalğan ğana emes, keybir adamdardıñ ömirin qauipke duşar etetin aqparat», – dep sınadı.

Prezident Tramp ta öziniñ «Tvitter» paraqşasında bwl habarğa renişti pikirin bildirgen. Ol: «Meniñ oyımşa, olar (CNN) reytingi tömendep ketkendikten şığınğa batıp otır. Biraq, şınına kelsek, CNN AQŞ üşin ziyandı. Onıñ halıqaralıq bölimi älemge jalğan jäne bwrmalanğan aqparattardı taratıp otır», – dep sökti.

Al, Resey Sırtqı ister ministrligi de bwl turalı reseylik basılımdarğa jauap bergen. «Bwl turalı CIA rastasın nemese joqqa şığarsın. Al endi, Lavrov pen Tramptıñ kezdesuine kelsek, mwnday jalğan qalıptı CNN özi oylap tapsa kerek», – degen Resey SİM tarabı.

Ortalıq barlau agenttiginiñ bwrınğı qızmetkerleri bwnday jağday bolğan künde de öte sirek bolatının aytqan. Al, endi ağılşınnıñ The Guardian basılımı bolsa, Reseydegi lauazımdı twlğalardıñ elden şığuı turalı zerttep körip, bwnday jağday soñğı ret 2010 jılı bolğanın ayttı. Sol kezde Resey barlau qızmetiniñ bir qızmetkeri elden jalğan pasportpen şığıp ketedi. Keyin, Resey sotı onı memleketke ziyan saldı degen ayıppen sırttay sottağan.

“The Qazaq Times”