اقش-تىڭ رەسەيدەگى تىڭشىسىن ەلدەن جاسىرىن الىپ كەتكەنى راس پا؟

امەريكالىق CNN ارناسى ءوزىنىڭ اقپارات كوزدەرىنە سىلتەمە جاساي وتىرىپ، اقش-تىڭ بارلاۋ قىزمەتى 2017 جىلى ءوزىنىڭ رەسەي ۇكىمەتىندە ىستەگەن تىڭشىسىن ەلدەن جاسىرىن الىپ  كەتكەنى تۋرالى جازدى. تەلەارنانىڭ ايتۋىنشا، اقش ارنايى قىزمەتىنىڭ رەسەيدەگى تىڭشىسىن ەلدەن الىپ كەتۋىنە دونالد ترامپ ادمينيستراتسياسىنىڭ جاسىرىن مالىمەتتەرمەن جۇمىس ىستەۋدەگى ولاقتىعى سەبەپ بولعان. بارلاۋ قىزمەتى ءوز تىڭشىسىنىڭ اشىققا شىعىپ قالۋىنان الاڭداعان.

حاباردا ايتىلۋىنشا، رەسەيدەگى تىڭشىنى الىپ كەتۋ تۋرالى شەشىم 2017 جىلى مامىر ايىندا پرەزيدەنت ترامپتىڭ رەسەي ءسىم باسشىسى سەرگەي لاۆروۆ جانە ورىس ەلشىسى سەرگەي كيسلياكپەن اق ۇيدەگى كەزدەسۋىنەن كەيىن قابىل الىنعان. تەلەارنانىڭ بولجاۋىنشا، سول رەتكى كەزدەسۋدە، پرەزيدەنت ترامپ جانە ونىڭ ادمينستراتسياسى ارنايى قىزمەت جەتەكشىلىگىنە ىڭعايسىزدىق تۋدىرعان بىرقاتار وعاش ارەكەتتەرگە جول بەرگەن. وسىدان كەيىن بارلاۋ قىزمەتى ءوزىنىڭ رەسەيدەگى تىڭشىسىنىڭ قاۋىپسىزدىگىنەن الاڭداي باستاعان.

CNN-ءنىڭ اقپارات كوزى بەرگەن مالىمەتكە قاراعاندا، رەسەيدەگى تىڭشى تۋرالى اقش ۇكىمەتى مەن ارنايى قىزمەتىندە تەك ساناۋلى ادامدار عانا بىلگەن. سونداي-اق، ونىڭ بەرگەن قۇپيا مالىمەتتەرى اسا قۇندى بولىپ، ونىڭ ورنىنا بالاما اگەنت مۇلدە جوق بولعان.

بىراق، اتالعان حاباردى تاراتقانى ءۇشىن CNN ارناسى اقش ۇكىمەتى مەن ورتالىق بارلاۋ اگەنتتىگى (CIA نەمەسە وبا) جاعىنان سىنعا دا ۇشىراۋدا. ورتالىق بارلاۋ اگەنتتىگىنىڭ وكىلى بريتانني برامەلل اتالعان مالىمەتتە جوققا شىعاردى جانە ونى جاڭىلىسقا الىپ كەلەتىن جالعان مالىمەت دەپ باعالادى. اق ءۇي دە بۇل تۋرالى مالىمدەمە جاساپ: «بۇل اقپارات جالعان عانا ەمەس، كەيبىر ادامداردىڭ ءومىرىن قاۋىپكە دۋشار ەتەتىن اقپارات»، – دەپ سىنادى.

پرەزيدەنت ترامپ تا ءوزىنىڭ «تۆيتتەر» پاراقشاسىندا بۇل حابارعا رەنىشتى پىكىرىن بىلدىرگەن. ول: «مەنىڭ ويىمشا، ولار (CNN) رەيتينگى تومەندەپ كەتكەندىكتەن شىعىنعا باتىپ وتىر. بىراق، شىنىنا كەلسەك، CNN اقش ءۇشىن زياندى. ونىڭ حالىقارالىق ءبولىمى الەمگە جالعان جانە بۇرمالانعان اقپاراتتاردى تاراتىپ وتىر»، – دەپ سوكتى.

ال، رەسەي سىرتقى ىستەر مينيسترلىگى دە بۇل تۋرالى رەسەيلىك باسىلىمدارعا جاۋاپ بەرگەن. «بۇل تۋرالى CIA راستاسىن نەمەسە جوققا شىعارسىن. ال ەندى، لاۆروۆ پەن ترامپتىڭ كەزدەسۋىنە كەلسەك، مۇنداي جالعان قالىپتى CNN ءوزى ويلاپ تاپسا كەرەك»، – دەگەن رەسەي ءسىم تارابى.

ورتالىق بارلاۋ اگەنتتىگىنىڭ بۇرىنعى قىزمەتكەرلەرى بۇنداي جاعداي بولعان كۇندە دە وتە سيرەك بولاتىنىن ايتقان. ال، ەندى اعىلشىننىڭ The Guardian باسىلىمى بولسا، رەسەيدەگى لاۋازىمدى تۇلعالاردىڭ ەلدەن شىعۋى تۋرالى زەرتتەپ كورىپ، بۇنداي جاعداي سوڭعى رەت 2010 جىلى بولعانىن ايتتى. سول كەزدە رەسەي بارلاۋ قىزمەتىنىڭ ءبىر قىزمەتكەرى ەلدەن جالعان پاسپورتپەن شىعىپ كەتەدى. كەيىن، رەسەي سوتى ونى مەملەكەتكە زيان سالدى دەگەن ايىپپەن سىرتتاي سوتتاعان.

“The Qazaq Times”