Süriyadan qaytarılğan balalar. Foto: QazAqparat.

Mälimetterge say, tört retki «Jusan» operaciyası barısında Süriyadan 400-ge juıq bala elge jetkizildi. Ärine, «Adasqannıñ aldı jön, artı soqpaq...». Eldikti tanıtıp, eldiktegi keñdikti tanıtıp, adasqan ağayındı elge qaytarıp, bir qazaqtıñ balası bolsa da jat topıraqta janarın jäudiretip qaldırudı qalamadıq. Degenmen, adasqan azamattardı, özi bolmasa bala-şağasın elge jetkize salumen şarua bite salmaydı. Sebebi, olardıñ jat topıraqqa toy toylap nemese sayahattap ketpegeni jwrtqa mälim-di. Olar jat ağımdardıñ, zalalı mol, zobalañı köp ekstremistik toptardıñ arbauına tüskendikten, qoğamımızdı onday indetten taza wstau üşin de elge qaytarılğan azamattarmen az bolmağan jwmıs alıp baruğa tura keledi. Äsirese, olardıñ jas balalarına jüyeli äri ğılımi türde kömek körsetu tipti de kerek.

Ökiniştisi, qoğamda qazir «Jusan» operaciyası arqılı elge äkelingen azamattar turalı tereñ tüsinik joq desek te boladı. Olardıñ jat ağımğa qanşalıqtı ulanğanın, balalardıñ sanasında ekstremistik piğıldıñ wrığı sebilgen be, joq degen saualdardıñ jauabın bilmeymiz. Sondıqtan da, «Jusan-4» operaciyasımen elge kelgen balalarmen jwmıs jürgizgen dintanuşı, maman Balğabek Äbdiqayımwlınıñ mına bir jazbasın sayt oqırmandarına wsınıp otırmız.

Qoğam nazarın audaratın mäsele. Foto: QazAqparat.

Düniege keşe ğana kelgen, örimdey jas bala bolğanına qaramastan, olardıñ qoyğan swraqtarı men tartqan tauqımetteri kez kelgen adamdı tereñ oyğa tartadı.

Siriyadağı soğıs aymağınan oralğan 7 jastağı bala menen «Ahi, nege seniñ saqalıñ joq, käpirler qırıp tastadı ma ne?» dep swradı. Ärine, bala özine üyretkenin aytadı. Al osı balağa saqalı joq käpir degendi kim üyretti? Jalğan jihad jolında adasıp jürgen ata-anaları ökinişke oray balalarınıñ sanasın osı sekildi qate mälimettermen toltırıp tastağan. Balalar 6-7 jasında qolına qaru wstap körgenderin, äkeleri onı qalay paydalanudı üyretkenderin jarısa maqtanıp aytıp jattı. Sonday aq, «Bäladqa» barmağandar mwsılman sanala ma degen swraq qoydı.

Eñ auırı, olardıñ äkeleri joq. Äkeniñ meyirimin sağınğannan bolar, 4-8 jas arasındağı säbi balalar meni körgende mağan qaray jarısa jügirip bireuleri arqama şığıp, endi bireuleri tizeme jastanıp erkelegileri kelip jattı. Ata-analarınıñ kesirinen tağdırdıñ tauqımetin erte şekken, balalıq balğın şaqtı oyınmen emes jarılğan snaryadtar men bombalardıñ  işinde ötkizgen säbiler Qazaqstanğa kelip, tınıştıq pen beybitşilikti körip jadırap jügirip oynap jür. Sonıñ özinde jüzderinen: «İşimdegini tauıp al, köp närseni ayta almaymın» degen hal bayqaladı.

Abdurrahman attı bala äkesin sağınğanın, degenmen onı endi körmeytinin, sebebi, şahit bolğanın salqınqandılıqpen aytıp bergeni,  ömirdiñ onı erte eseytkenin bildiredi. Äkesimen jwmaqta kezdesetinine senimdi. Ärkimge öziniñ äkesi asqar tau, kez kelgen qiındıqta pana bolar qamal bolıp körineri haq. Sondıqtan bolar, seniñ äkeñ qate jolda ketken dep aytıp balanıñ jüregin jaralağım kelmedi.

Sanasına Siriyadağı ömir siñip qalğan balanıñ tağdırı bir jağınan ayanıştı, bir jağınan ömir boyı baqılaudı talap etetin mäsele. Aştıqtı körgen, jauğan oqtıñ astınan eñbektep ötip ketken, jası äli 10-ğa tolmağan balalardı özimizdiñ kündelikti qoğamğa beyimdeu biraz şarua ekendigi tüsinikti. Bwl balalar Qwran ayattarın jattap, qate bolsa da dini ükimderdi üyrengen. Sondıqtan, olarmen psihologtarmen qatar, din qızmetkerleri (imamdar men teologtar) da üzbey jwmıs jürgizip otıruları qajet.

“The Qazaq Times”