Jetisu törinde «100 tomdıq Jetisu kitaphanası» jobasımen jarıq körgen 41 jaña kitaptıñ twsauı kesildi.

Şarağa aymaqtağı elimizdiñ ädebieti men mädenietiniñ damuına  öz ülesin qosıp kele jatqan ziyalı qauım ökilderi men aqın-jazuşılar, basqa da tanımal adamdar qatıstı.

Twsaukeserge oblıs äkiminiñ orınbasarı Aqan Äbduäliev qatısıp, öz kezeginde ol: «Bügingi oqırmanğa  jol tartıp otırğan jaña tuındılardıñ barlığı oblıs äkimi Amandıq Batalovtıñ qoldauımen jarıq kördi. Sonıñ  teñ jarımı erteñinen ülken ümit küttirip otırğan  jastardiki. Olardıñ arasında aymağımızdıñ maqtanışına aynalğan ötkir oy, şwraylı tilimen elimizge tanımal bola bastağan nebir üzdikter bar. Sondıqtan jalpı qalamgerlerdiñ qalamına qarım, özderine erekşe darın tileymiz», – dey kele jiınğa jinalğan qalamgerlermen birlesip, su jaña kitaptardıñ lentasın qidı.

Bwdan soñ  Qazaqstan Jazuşılar odağı törağasınıñ orınbasarı Baqıt Bedelhan öñir ädebieti men mädenietiniñ örkendeuine ünemi qoldau körsetip kele jatqan oblıs basşısına ayrıqşa alğısın bildirdi. Sonımen qatar, Jetisu jerinde küzge qaray oblıs äkimdigi men Qazaqstan Jazuşılar odağınıñ birlesken jobası retinde respublikalıq ülken ädebiet forumı ötetinin atap ötti. Äri sol şara barısında Odaqqa jas qalamgerlerdiñ de qabıldanatının jetkizdi.

Bir atap öterlik jayt – biılğı «100 tomdıq Jetisu kitaphanası» jobasınıñ erekşeligi de sol, bir mezette 20 jas qalamgerdiñ jinağınıñ jarıq körui jäne onıñ işinde 18 avtordıñ twñğış kitabınıñ oqırmanğa jol tartuı boldı.  Bwl Jastar jılına oray Qazaqstan Jazuşılar odağımen birlese jwmıs istegen oblıstıq mädeniet, arhivter jäne qwjattama basqarmasınıñ bastaması.

Bastama demekşi, osı rette jiırma jas qalamgerdi iriktep alıp, olardıq şığarmalarınıñ jarıq köriuine jol aşqan Qazaqstan Jazuşılar odağı Almatı oblıstıq filialınıñ direktorı, aqın Erlan Jünis basşılıqqa qwrmet bildirip, atqarılıp jatqan igi şaralardı tilge tiek etti.

«Jıl sayın oblıs äkiminiñ qoldauımen aymağımızdağı aqın-jazuşılardıñ köptegen kitaptarı jarıq köredi. Mäselen, ötken jılı 37 kitap jarıq körse, biılğı jıldıñ alğaşqı jartısında minekey 41 kitap baspadan şıqtı.  Bwl kitaptardıñ  20-sı biılğı «Jastar jılı» ayasında, jas qalamgerlerdi qoldau negizinde arnayı basılıp şıqqan olardıñ alğaşqı kitaptarı. Osı qwsqanat-tuındılar jastardıñ alğaşqı şığarmaşılıq ömirindegi altın qazığı, tipti, Jetisudıñ, qazaq ädebietiniñ ömirindegi ülken bir tarihi sätterdiñ biri boldı dep sanaymın», – dedi Erlan Töspaywlı.

Ayta keteyik, jiındı oblıstıq mädeniet, arhivter jäne qwjattama basqarması basşısı Marlen Kölbaev jürgizip otırdı.  Şaranıñ joğarı deñgeyde ötuine jetisu ädebietiniñ altın sarayı S. Seyfullin atındağı ämbebap kitaphanasınıñ wjımı atsalıstı.

"The Qazaq Times"