جەتىسۋ تورىندە «100 تومدىق جەتىسۋ كىتاپحاناسى» جوباسىمەن جارىق كورگەن 41 جاڭا كىتاپتىڭ تۇساۋى كەسىلدى.

شاراعا ايماقتاعى ەلىمىزدىڭ ادەبيەتى مەن مادەنيەتىنىڭ دامۋىنا  ءوز ۇلەسىن قوسىپ كەلە جاتقان زيالى قاۋىم وكىلدەرى مەن اقىن-جازۋشىلار، باسقا دا تانىمال ادامدار قاتىستى.

تۇساۋكەسەرگە وبلىس اكىمىنىڭ ورىنباسارى اقان ابدۋاليەۆ قاتىسىپ، ءوز كەزەگىندە ول: «بۇگىنگى وقىرمانعا  جول تارتىپ وتىرعان جاڭا تۋىندىلاردىڭ بارلىعى وبلىس اكىمى اماندىق باتالوۆتىڭ قولداۋىمەن جارىق كوردى. سونىڭ  تەڭ جارىمى ەرتەڭىنەن ۇلكەن ءۇمىت كۇتتىرىپ وتىرعان  جاستاردىكى. ولاردىڭ اراسىندا ايماعىمىزدىڭ ماقتانىشىنا اينالعان وتكىر وي، شۇرايلى تىلىمەن ەلىمىزگە تانىمال بولا باستاعان نەبىر ۇزدىكتەر بار. سوندىقتان جالپى قالامگەرلەردىڭ قالامىنا قارىم، وزدەرىنە ەرەكشە دارىن تىلەيمىز»، – دەي كەلە جيىنعا جينالعان قالامگەرلەرمەن بىرلەسىپ، سۋ جاڭا كىتاپتاردىڭ لەنتاسىن قيدى.

بۇدان سوڭ  قازاقستان جازۋشىلار وداعى توراعاسىنىڭ ورىنباسارى باقىت بەدەلحان ءوڭىر ادەبيەتى مەن مادەنيەتىنىڭ وركەندەۋىنە ۇنەمى قولداۋ كورسەتىپ كەلە جاتقان وبلىس باسشىسىنا ايرىقشا العىسىن ءبىلدىردى. سونىمەن قاتار، جەتىسۋ جەرىندە كۇزگە قاراي وبلىس اكىمدىگى مەن قازاقستان جازۋشىلار وداعىنىڭ بىرلەسكەن جوباسى رەتىندە رەسپۋبليكالىق ۇلكەن ادەبيەت فورۋمى وتەتىنىن اتاپ ءوتتى. ءارى سول شارا بارىسىندا وداققا جاس قالامگەرلەردىڭ دە قابىلداناتىنىن جەتكىزدى.

ءبىر اتاپ وتەرلىك جايت – بيىلعى «100 تومدىق جەتىسۋ كىتاپحاناسى» جوباسىنىڭ ەرەكشەلىگى دە سول، ءبىر مەزەتتە 20 جاس قالامگەردىڭ جيناعىنىڭ جارىق كورۋى جانە ونىڭ ىشىندە 18 اۆتوردىڭ تۇڭعىش كىتابىنىڭ وقىرمانعا جول تارتۋى بولدى.  بۇل جاستار جىلىنا وراي قازاقستان جازۋشىلار وداعىمەن بىرلەسە جۇمىس ىستەگەن وبلىستىق مادەنيەت، ارحيۆتەر جانە قۇجاتتاما باسقارماسىنىڭ باستاماسى.

باستاما دەمەكشى، وسى رەتتە جيىرما جاس قالامگەردى ىرىكتەپ الىپ، ولاردىق شىعارمالارىنىڭ جارىق كورىۋىنە جول اشقان قازاقستان جازۋشىلار وداعى الماتى وبلىستىق فيليالىنىڭ ديرەكتورى، اقىن ەرلان ءجۇنىس باسشىلىققا قۇرمەت ءبىلدىرىپ، اتقارىلىپ جاتقان يگى شارالاردى تىلگە تيەك ەتتى.

«جىل سايىن وبلىس اكىمىنىڭ قولداۋىمەن ايماعىمىزداعى اقىن-جازۋشىلاردىڭ كوپتەگەن كىتاپتارى جارىق كورەدى. ماسەلەن، وتكەن جىلى 37 كىتاپ جارىق كورسە، بيىلعى جىلدىڭ العاشقى جارتىسىندا مىنەكەي 41 كىتاپ باسپادان شىقتى.  بۇل كىتاپتاردىڭ  20-سى بيىلعى «جاستار جىلى» اياسىندا، جاس قالامگەرلەردى قولداۋ نەگىزىندە ارنايى باسىلىپ شىققان ولاردىڭ العاشقى كىتاپتارى. وسى قۇسقانات-تۋىندىلار جاستاردىڭ العاشقى شىعارماشىلىق ومىرىندەگى التىن قازىعى، ءتىپتى، جەتىسۋدىڭ، قازاق ادەبيەتىنىڭ ومىرىندەگى ۇلكەن ءبىر تاريحي ساتتەردىڭ ءبىرى بولدى دەپ سانايمىن»، – دەدى ەرلان ءتوسپايۇلى.

ايتا كەتەيىك، جيىندى وبلىستىق مادەنيەت، ارحيۆتەر جانە قۇجاتتاما باسقارماسى باسشىسى مارلەن كولباەۆ جۇرگىزىپ وتىردى.  شارانىڭ جوعارى دەڭگەيدە وتۋىنە جەتىسۋ ادەبيەتىنىڭ التىن سارايى س. سەيفۋللين اتىنداعى امبەباپ كىتاپحاناسىنىڭ ۇجىمى اتسالىستى.

"The Qazaq Times"