Qazaqstan prezidenti Qasım-Jomart Toqaev jäne BWW bas hatşısı Antoniu Guterriş. Foto: http://today.kz

Qazaqstan prezidenti Qasım-Jomart Toqaev BWW Bas hatşısı Antoniu Guterrişke köñil aytu jedelhatın joldadı.

Memleket basşısı Qazaqstan halqınıñ jäne jeke öziniñ atınan Bengazidegi jarılıs saldarınan qaza tapqan BWW-nıñ Liviyadağı missiyası qızmetkerleriniñ otbasıları men jaqındarına köñil ayttı.

Jedelhatta: «Bwl zwlımdıqqa tolı lañkestik şabuıl izgilik pen janaşırlıq qwndılıqtarın däripteytin qasietti mwsılman merekesi – Qwrban ayt qarsañında jasalğanı asa jan türşigerlik jağday bolıp tabıladı. Älemdik qauımdastıqtıñ zorlıq-zombılıqqa qarsı birlesken jäne batıl küreske şaqıratın ündeuin berik qolday otırıp, Qazaqstan lañkestiktiñ eşqanday türi men körinisin qabıldamaydı. Biz BWW qızmetkerleriniñ jahandıq wyımnıñ igi maqsattarına qol jetkizu jolındağı qızmetin joğarı bağalaymız», – delingen.

Qazir Liviyada Tripolidegi Faiz Saradj ükimeti men general Halifa Haftar äskeri arasında soğıs jürip jatır. Haftar qwrban aytqa oray atıstı uaqıtşa toqtatatının mälimdegen. Degenmen, 11 tamızda Liviyanıñ Bengazi qalasında bomba jasırınğan kölik jarılıp, BWW-nıñ 3 qızmetkeri qaza tapqan. BWW Bas hatşısı Antoniu Guterriş qaza tapqandardıñ otbasılarına köñil aytıp, qwrban ayt kezinde jasalğan lañkestikti qatañ ayıptadı.

"The Qazaq Times"