پرەزيدەنت توقاەۆ ا.گۋتەرريشكە جەدەلحات جولدادى

قازاقستان پرەزيدەنتى قاسىم-جومارت توقاەۆ بۇۇ باس حاتشىسى انتونيۋ گۋتەرريشكە كوڭىل ايتۋ جەدەلحاتىن جولدادى.

مەملەكەت باسشىسى قازاقستان حالقىنىڭ جانە جەكە ءوزىنىڭ اتىنان بەنگازيدەگى جارىلىس سالدارىنان قازا تاپقان بۇۇ-نىڭ ليۆياداعى ميسسياسى قىزمەتكەرلەرىنىڭ وتباسىلارى مەن جاقىندارىنا كوڭىل ايتتى.

جەدەلحاتتا: «بۇل زۇلىمدىققا تولى لاڭكەستىك شابۋىل ىزگىلىك پەن جاناشىرلىق قۇندىلىقتارىن دارىپتەيتىن قاسيەتتى مۇسىلمان مەرەكەسى – قۇربان ايت قارساڭىندا جاسالعانى اسا جان تۇرشىگەرلىك جاعداي بولىپ تابىلادى. الەمدىك قاۋىمداستىقتىڭ زورلىق-زومبىلىققا قارسى بىرلەسكەن جانە باتىل كۇرەسكە شاقىراتىن ۇندەۋىن بەرىك قولداي وتىرىپ، قازاقستان لاڭكەستىكتىڭ ەشقانداي ءتۇرى مەن كورىنىسىن قابىلدامايدى. ءبىز بۇۇ قىزمەتكەرلەرىنىڭ جاھاندىق ۇيىمنىڭ يگى ماقساتتارىنا قول جەتكىزۋ جولىنداعى قىزمەتىن جوعارى باعالايمىز»، – دەلىنگەن.

قازىر ليۆيادا تريپوليدەگى فايز سارادج ۇكىمەتى مەن گەنەرال حاليفا حافتار اسكەرى اراسىندا سوعىس ءجۇرىپ جاتىر. حافتار قۇربان ايتقا وراي اتىستى ۋاقىتشا توقتاتاتىنىن مالىمدەگەن. دەگەنمەن، 11 تامىزدا ليۆيانىڭ بەنگازي قالاسىندا بومبا جاسىرىنعان كولىك جارىلىپ، بۇۇ-نىڭ 3 قىزمەتكەرى قازا تاپقان. بۇۇ باس حاتشىسى انتونيۋ گۋتەرريش قازا تاپقانداردىڭ وتباسىلارىنا كوڭىل ايتىپ، قۇربان ايت كەزىندە جاسالعان لاڭكەستىكتى قاتاڭ ايىپتادى.

"The Qazaq Times"