QR Ükimet basşısı B.Sağıntaev jäne Qırğızstan ükimet basşısı Sooronbay Jeenbekov. Foto: sputniknews.kz

Bügin Bişkekte QR Prem'er-Ministri Baqıtjan Sağıntaev Euraziyalıq Ükimetaralıq keñestiñ kezekti otırısına qatıstı. Bwl turalı Ükimet jetekşisiniñ resmi saytı habarlaydı. 

Öz sözinde Qazaqstannıñ Prem'er-Ministri  Euraziyalıq ekonomikalıq odaq elderi arasındağı saudanı arttıru üşin özara is-qimıldı nığaytuğa, jaña tiimdi qwraldardı qalıptastıruğa ortaq küşterdi şoğırlandırudıñ mañızdılığın basa ayttı.

«Osı qızmettegi mañızdı bağıt - kedergiler men şekteulerdi joyu bolıp tabıladı. Bwl jwmıstı jüyeli äri kezeñ-kezeñimen jürgizgen jön», - dedi QR Prem'er-Ministri B. Sağıntaev.

Odaqtağı özara is-qimıldı nığaytudıñ tağı bir elementi, QR Prem'er-Ministriniñ pikirinşe, memleketterimizdiñ öndiruşileri men biznesi üşin eñ qolaylı jağdaylardı jasau mäselesi bolıp tabıladı.

«EAEO käsipkerleri ıqpaldasudan, ortaq narıqtardı qwrudan eleuli, jaqsı nätije kütedi. Sol sebepti de biz «oyınnıñ ortaq erejeleri» dep atalatın birıñğay retteudi jüzege asıruğa özimiz kelisken salalarda bizneske qajetti sapalı, tiimdi äri auırtpalıq tüsirmeytin retteu täjiribesine qol jetkizuimiz qajet», - dep atap ötti QR Prem'er-Ministri B. Sağıntaev.

EÜAK otırısı barısında EAEO-dağı integraciyalıq üderisterdi odan äri nığaytuğa bağıttalğan birqatar özekti mäseleler talqılandı. EAEO-ğa müşe memleketter arasındağı sauda-ekonomikalıq ıntımaqtastıqqa jäne özara saudanı keñeytuge, AÖK damıtuğa jäne auılşaruaşılıq maşina qwrastıruğa erekşe köñil bölindi.

Otırıs qorıtındısı boyınşa özara sauda mäselelerine, integraciyalıq äleuetke ie ekonomika salalarına, sauda kelissözderi nätijelerine jäne basqalarına qatıstı birqatar birlesken qwjattarğa qol qoyıldı.

Söylegen sözdiñ tolıq mätinin mına jerden oqıñızdar.

"The Qazaq Times"