قر ۇكىمەت باسشىسى ب.ساعىنتاەۆ جانە قىرعىزستان ۇكىمەت باسشىسى سوورونباي جەەنبەكوۆ. فوتو: sputniknews.kz

بۇگىن بىشكەكتە قر پرەمەر-ءمينيسترى باقىتجان ساعىنتاەۆ ەۋرازيالىق ۇكىمەتارالىق كەڭەستىڭ كەزەكتى وتىرىسىنا قاتىستى. بۇل تۋرالى ۇكىمەت جەتەكشىسىنىڭ رەسمي سايتى حابارلايدى. 

ءوز سوزىندە قازاقستاننىڭ پرەمەر-ءمينيسترى  ەۋرازيالىق ەكونوميكالىق وداق ەلدەرى اراسىنداعى ساۋدانى ارتتىرۋ ءۇشىن ءوزارا ءىس-قيمىلدى نىعايتۋعا، جاڭا ءتيىمدى قۇرالداردى قالىپتاستىرۋعا ورتاق كۇشتەردى شوعىرلاندىرۋدىڭ ماڭىزدىلىعىن باسا ايتتى.

«وسى قىزمەتتەگى ماڭىزدى باعىت - كەدەرگىلەر مەن شەكتەۋلەردى جويۋ بولىپ تابىلادى. بۇل جۇمىستى جۇيەلى ءارى كەزەڭ-كەزەڭىمەن جۇرگىزگەن ءجون»، - دەدى قر پرەمەر-ءمينيسترى ب. ساعىنتاەۆ.

وداقتاعى ءوزارا ءىس-قيمىلدى نىعايتۋدىڭ تاعى ءبىر ەلەمەنتى، قر پرەمەر-ءمينيسترىنىڭ پىكىرىنشە، مەملەكەتتەرىمىزدىڭ وندىرۋشىلەرى مەن بيزنەسى ءۇشىن ەڭ قولايلى جاعدايلاردى جاساۋ ماسەلەسى بولىپ تابىلادى.

«ەاەو كاسىپكەرلەرى ىقپالداسۋدان، ورتاق نارىقتاردى قۇرۋدان ەلەۋلى، جاقسى ناتيجە كۇتەدى. سول سەبەپتى دە ءبىز «ويىننىڭ ورتاق ەرەجەلەرى» دەپ اتالاتىن بىرىڭعاي رەتتەۋدى جۇزەگە اسىرۋعا ءوزىمىز كەلىسكەن سالالاردا بيزنەسكە قاجەتتى ساپالى، ءتيىمدى ءارى اۋىرتپالىق تۇسىرمەيتىن رەتتەۋ تاجىريبەسىنە قول جەتكىزۋىمىز قاجەت»، - دەپ اتاپ ءوتتى قر پرەمەر-ءمينيسترى ب. ساعىنتاەۆ.

ەۇاك وتىرىسى بارىسىندا ەاەو-داعى ينتەگراتسيالىق ۇدەرىستەردى ودان ءارى نىعايتۋعا باعىتتالعان بىرقاتار وزەكتى ماسەلەلەر تالقىلاندى. ەاەو-عا مۇشە مەملەكەتتەر اراسىنداعى ساۋدا-ەكونوميكالىق ىنتىماقتاستىققا جانە ءوزارا ساۋدانى كەڭەيتۋگە، اوك دامىتۋعا جانە اۋىلشارۋاشىلىق ماشينا قۇراستىرۋعا ەرەكشە كوڭىل ءبولىندى.

وتىرىس قورىتىندىسى بويىنشا ءوزارا ساۋدا ماسەلەلەرىنە، ينتەگراتسيالىق الەۋەتكە يە ەكونوميكا سالالارىنا، ساۋدا كەلىسسوزدەرى ناتيجەلەرىنە جانە باسقالارىنا قاتىستى بىرقاتار بىرلەسكەن قۇجاتتارعا قول قويىلدى.

سويلەگەن ءسوزدىڭ تولىق ءماتىنىن مىنا جەردەن وقىڭىزدار.

"The Qazaq Times"