Iran Islam Respublikasınıñ eñ joğarı jetekşisi ayatolla Homeyni  AQŞ-pen kelissöz jürgizudiñ mümkin emes ekenin tağı da qaytaladı. Homeyni särsenbi küni jasağan mälimdemesinde AQŞ-tıñ kelissözge wsınıs etuin aldamşılıq äreket retinde bağalağan.

Irannıñ ruhani kösemi AQŞ-tıñ Irandı qaytalay kelisimge keluge şaqıruı belgili därejede Irannıñ küş-quatın moyındauı jäne Irannıñ jalğastı küşeyuine degen alañdauı dep sanaydı. Ol sözinde: "AQŞ-pen kelissözge kelu degenimiz Irannıñ qarusızdanıp, Iran halqınıñ küş-quatınan ayrıluı", – degen.

Sayasat arenasında da emociyanı köbirek paydalanatın Iran lauazımdıları, Tramptıñ sankciyaların "ekonomikalıq terrorizm" retinde bağalap keledi. Ayatolla Homeyni kezekti mälimdemesinde AQŞ-tı "qaqtığıs, janjal tudıruşı jäne älem elderiniñ baylığın tonauşı jiirkenişti ükimet" dep körsetken. Äri, Yemendegi soğısqa baylanıstı da AQŞ-tı ayıptağan.

Birneşe aydan beri küşeye tüsken AQŞ pen Iran arasındağı qayşılıq, ötken aptadan beri tipti de uşığa tüsti. Iran qarulı küşteri amerikalıq wşqışsız wşu qwrılğısın atıp tüsirgennen keyin,  Tramp ükimeti Iranğa jaña sankciya engizdi. Qazir taraptar kelissöz mümkindiginen barğan sayın alıstap, qarulı şabuıldar turalı jii aytıla bastadı. Bwl jağday aymaqtağı jäne älem elderin soğıs qaupine baylanıstı alañdatıp otır.

“The Qazaq Times”