Foto: https://global.unitednations.entermediadb.net

AQŞ pen Iran arasındağı dau basılmay twrıp, Yemendegi husitter Saud Arabiyasınıñ oñtüstigindegi Aba äuejayına şabuıldadı. Şığanaqtağı jağdaydıñ uşığuına baylanıstı BWW ökilderi resmi mälimdeme jasadı.

Reuters agenttiginiñ mälimetinşe, äuejaydağı şabuıl saldarınan bir adam qaza tauıp, jeteui jaralanğan. Osıdan birer kün bwrın Iran AQŞ-tıñ joyğış wşağın atıp tüsirgen bolatın. Oqiğadan keyin AQŞ Iranğa qarsı sankciya engizetinin aytsa, Iran AQŞ dollarınan tübegeyli bas tartatının habarladı. Keyinnen AQŞ-tıñ memlekettik hatşısı Mayk Pompeo Saud Arabiyasına barıp, Saud Arabiyasınıñ koroli Sälman ben Äbdel Azizben kezdesip, Oman şığanağındağı ahualdı talqıladı. Mayk Pompeo bwl mäselege qatıstı resmi mälimdeme jasap, AQŞ-tıñ Iran aumağında tıñşılıq etui jäne şekaranı bwzu turalı aqpardıñ jalğan ekenin ayttı. Eger Iran jağdaydı osılay uşıqtıra berse, onda AQŞ külli älemdi oğan qarsı qoyatının jetkizdi. Pompeo sözinde: «Parsı şığanağındağı Odaq qana emes, öñirdegi qauipti jaqsı tüsinetin Aziya men Europadağı elderi terrorizdi jaqtaytın Iranğa qarsı şığadı. Donal'd Tramp bastağan is ayağına deyin jetetinin äli de köresizder. Osı düysenbide Iranğa qarsı jaña sankciyalar salınadı. Irannıñ yadrolıq qaru jüyesi men zımıran bağdarlamasın iske asıruına jol bermeytinimizdi jahan elderi jaqsı tüsinui tiis», – dep mälimdegen.

Eki el arasındağı dauğa qatıstı Irannıñ sırtqı ister ministrliginiñ resmi ökili Seyed Abbas Muavi: «Soñğı 40 jılda AQŞ-tıñ bizge salmağan sankciyası qalmadı. Odan ne wttı? Eşnärse wtpadı. Irannıñ birlesken keşendi is-qimıl josparı ayasında zañdı qwqığı qamtılmayınşa, biz yadrolıq kelisimde bizge jüktelgen mindettemeden birtindep bas tartamız. Sondıqtan Europa elderi üşin mäseleniñ şeşimin tabuğa birneşe kün qaldı. Olar ne isteu keregin jaqsı biledi. Eşqanday şara qoldanbasa, onda biz kelesi qadamğa köşemiz», – degen.

Şığanaqtağı jağdayğa BWW tarabı da alañdauşılıq tanıtıp otır. BWW-nıñ Bas hatşısı Antonio Guterriş: «Şığanaqtağı jağdaydı jiti nazarda wstau öte mañızdı. Mwnday jağdayda sabır saqtağan jön. Älem şığanaqtağı soğıstı kötere almaydı», – dep mälimdedi. Degenmen, AQŞ – Iran qaqtığısınıñ qaşan şeşim tabatını beymälim.

"The Qazaq Times"