بۇۇ اقش – يران داۋىنا قاتىستى مالىمدەدە جاسادى

اقش پەن يران اراسىنداعى داۋ باسىلماي تۇرىپ، يەمەندەگى حۋسيتتەر ساۋد ارابياسىنىڭ وڭتۇستىگىندەگى ابا اۋەجايىنا شابۋىلدادى. شىعاناقتاعى جاعدايدىڭ ۋشىعۋىنا بايلانىستى بۇۇ وكىلدەرى رەسمي مالىمدەمە جاسادى.

Reuters اگەنتتىگىنىڭ مالىمەتىنشە، اۋەجايداعى شابۋىل سالدارىنان ءبىر ادام قازا تاۋىپ، جەتەۋى جارالانعان. وسىدان بىرەر كۇن بۇرىن يران اقش-تىڭ جويعىش ۇشاعىن اتىپ تۇسىرگەن بولاتىن. وقيعادان كەيىن اقش يرانعا قارسى سانكتسيا ەنگىزەتىنىن ايتسا، يران اقش دوللارىنان تۇبەگەيلى باس تارتاتىنىن حابارلادى. كەيىننەن اقش-تىڭ مەملەكەتتىك حاتشىسى مايك پومپەو ساۋد ارابياسىنا بارىپ، ساۋد ارابياسىنىڭ كورولى ءسالمان بەن ابدەل ازيزبەن كەزدەسىپ، ومان شىعاناعىنداعى احۋالدى تالقىلادى. مايك پومپەو بۇل ماسەلەگە قاتىستى رەسمي مالىمدەمە جاساپ، اقش-تىڭ يران اۋماعىندا تىڭشىلىق ەتۋى جانە شەكارانى بۇزۋ تۋرالى اقپاردىڭ جالعان ەكەنىن ايتتى. ەگەر يران جاعدايدى وسىلاي ۋشىقتىرا بەرسە، وندا اقش كۇللى الەمدى وعان قارسى قوياتىنىن جەتكىزدى. پومپەو سوزىندە: «پارسى شىعاناعىنداعى وداق قانا ەمەس، وڭىردەگى قاۋىپتى جاقسى تۇسىنەتىن ازيا مەن ەۋروپاداعى ەلدەرى تەرروريزدى جاقتايتىن يرانعا قارسى شىعادى. دونالد ترامپ باستاعان ءىس اياعىنا دەيىن جەتەتىنىن ءالى دە كورەسىزدەر. وسى دۇيسەنبىدە يرانعا قارسى جاڭا سانكتسيالار سالىنادى. يراننىڭ يادرولىق قارۋ جۇيەسى مەن زىمىران باعدارلاماسىن ىسكە اسىرۋىنا جول بەرمەيتىنىمىزدى جاھان ەلدەرى جاقسى ءتۇسىنۋى ءتيىس»، – دەپ مالىمدەگەن.

ەكى ەل اراسىنداعى داۋعا قاتىستى يراننىڭ سىرتقى ىستەر مينيسترلىگىنىڭ رەسمي وكىلى سەيەد ابباس مۋاۆي: «سوڭعى 40 جىلدا اقش-تىڭ بىزگە سالماعان سانكتسياسى قالمادى. ودان نە ۇتتى؟ ەشنارسە ۇتپادى. يراننىڭ بىرلەسكەن كەشەندى ءىس-قيمىل جوسپارى اياسىندا زاڭدى قۇقىعى قامتىلمايىنشا، ءبىز يادرولىق كەلىسىمدە بىزگە جۇكتەلگەن مىندەتتەمەدەن بىرتىندەپ باس تارتامىز. سوندىقتان ەۋروپا ەلدەرى ءۇشىن ماسەلەنىڭ شەشىمىن تابۋعا بىرنەشە كۇن قالدى. ولار نە ىستەۋ كەرەگىن جاقسى بىلەدى. ەشقانداي شارا قولدانباسا، وندا ءبىز كەلەسى قادامعا كوشەمىز»، – دەگەن.

شىعاناقتاعى جاعدايعا بۇۇ تارابى دا الاڭداۋشىلىق تانىتىپ وتىر. بۇۇ-نىڭ باس حاتشىسى انتونيو گۋتەرريش: «شىعاناقتاعى جاعدايدى ءجىتى نازاردا ۇستاۋ وتە ماڭىزدى. مۇنداي جاعدايدا سابىر ساقتاعان ءجون. الەم شىعاناقتاعى سوعىستى كوتەرە المايدى»، – دەپ مالىمدەدى. دەگەنمەن، اقش – يران قاقتىعىسىنىڭ قاشان شەشىم تاباتىنى بەيمالىم.

"The Qazaq Times"