Bügin Ukraina prezidenti Vladimir Zelenskiy men NATO-nıñ bas hatşısı Yens Stoltenbergtiñ resmi kezdesui ötedi. Basqosuda Ukrainanıñ NATO qwramına enui, reseylik tarappen aradağı şielenis jäne sankciya taqırıptarı qaralmaq. 

Qos taraptıñ kezdesuinen soñ, Ukraina – NATO komissiyasınıñ otırısın ötkizu josparlanğan. Ukrainform taratqan resmi habarlamada: «NATO-nıñ Bas hatşısı Yens Stoltenberg seysenbide Ukraina prezidenti Vladimir Zelenskiymen kezdesedi. Kezdesu al'yanstıñ ştab-päterinde ötedi», – delingen.

Kelissözderdiñ negizgi taqırıbı Ukraina men NATO-nıñ Donbass jäne Qırımda reseylik agressiyağa qarsı äreket etu, äskeri jattığular ötkizu. Osığan deyin NATO-nıñ parlamenttik assambleyası «agressorlıq Reseydiñ qauip-qaterine qarsı twru üşin» Ukrainanı al'yansqa qosudı talqılağan. Alayda, Mäskeu tarapı Şığıs Europada basqınşılıq sayasat jürgizip otırğanın tübegeyli joqqa şığardı.

2013 jılı Euromaydan dep atalğan jappay halıq tolquına qatısqandar Ukrainanıñ soltüstik al'yans pen Europalıq Odaqqa qosıluın talap etken. Sonday-aq Ukrainanıñ wltşıldar wyımı (OUN) Reseyden irgeni aulaq wstap, europocentrizmge bet alu kerektigin birneşe ret eskertken. Biraq 2014 jılğı Qırım anneksiyasınan soñ Resey tarapı Ukrainanı «uıstan» şığarmauğa tırısıp baqtı. Qanşa degenmen Ukraina da qwr qalğan joq: Mäskeumen aradağı birneşe baylanısqa nükte qoydı. Mäselen, biılğı jıldıñ qırküyeginde prezident Petr Poroşenko Ukraina men Resey arasındağı Dostıq, Intımaqtastıq jäne seriktestik kelisiminiñ küşin joyu turalı jarlıqtı qabıldadı. Al qazannan bastap Ukrainanıñ Jitomir oblısı orıstildi mädeni önimderge tolıqtay tıyım salğan bolatın. Tıyım aktisi boyınşa, orıstildi bağdarlama, fil'mderdi körsetuge, aqparattardı jariyalauğa bolmaydı. Sonday-aq, reseylik önerpazdardıñ gastrol'dik saparmen keluine de qatañ tıyım salınğan. Qarsılıq şaralar men zañdar «Resey Ukraina aumağın basıp aludan tolıqtay bas tartpayınşa» öz küşin joymaydı.

Qazirdiñ özinde Ukraina NATO-men birlesken äskeri jattığulardı jii ötkizedi. Sol sebepten de Resey NATO-nıñ Şığıs Europağa qaray wlğayuına qarsı bolu maqsatında auqımdı äskeri jattığu ötkizip keledi.

20 mamırda Zelenskiy Ukraina prezidenti lauazımındağı alğaşqı şeteldik saparın Bryussel'den bastauğa nietti ekendigin aytqan. Al kelesi saparın Uaşington men Torontoda jalğastırmaq. Jaña prezidentti wlıqtau räsimine qatısuğa kelgen AQŞ ökilderimen kezdesude Zelenskiy: «Donbass pen Qırımdağı Resey agressiyasına özimiz qarsı twra almaymız. Sondıqtan sizderdiñ kömekteriñiz kerek. Ukraina aumağınıñ twtastığın qalıpqa keltiru isinde köşbasşılıq tanıtıp, el işin reformalauda kömek körsetkenderiñiz üşin alğıs bildiremiz jäne Amerika tarabı Reseyge qarsı sankciyalardı küşeytudi jalğastırsa eken deymiz. AQŞ – Ukrainanıñ Resey agressiyasına qarsı twruda quattı äri iri seriktesteriniñ biri», – dep mälimdedi. Sonımen qatar, Ukrainanıñ jaña prezidenti elde aşıq, ädil jäne demokratiyalıq reforma jürgizuge äzir ekenin ayttı.

"The Qazaq Times"