ۋكراينا پرەزيدەنتى ۆلاديمير زەلەنسكي. فوتو: Google

بۇگىن ۋكراينا پرەزيدەنتى ۆلاديمير زەلەنسكي مەن ناتو-نىڭ باس حاتشىسى يەنس ستولتەنبەرگتىڭ رەسمي كەزدەسۋى وتەدى. باسقوسۋدا ۋكراينانىڭ ناتو قۇرامىنا ەنۋى، رەسەيلىك تاراپپەن اراداعى شيەلەنىس جانە سانكتسيا تاقىرىپتارى قارالماق. 

قوس تاراپتىڭ كەزدەسۋىنەن سوڭ، ۋكراينا – ناتو كوميسسياسىنىڭ وتىرىسىن وتكىزۋ جوسپارلانعان. ۋكراينفورم تاراتقان رەسمي حابارلامادا: «ناتو-نىڭ باس حاتشىسى يەنس ستولتەنبەرگ سەيسەنبىدە ۋكراينا پرەزيدەنتى ۆلاديمير زەلەنسكيمەن كەزدەسەدى. كەزدەسۋ اليانستىڭ شتاب-پاتەرىندە وتەدى»، – دەلىنگەن.

كەلىسسوزدەردىڭ نەگىزگى تاقىرىبى ۋكراينا مەن ناتو-نىڭ دونباسس جانە قىرىمدا رەسەيلىك اگرەسسياعا قارسى ارەكەت ەتۋ، اسكەري جاتتىعۋلار وتكىزۋ. وسىعان دەيىن ناتو-نىڭ پارلامەنتتىك اسسامبلەياسى «اگرەسسورلىق رەسەيدىڭ قاۋىپ-قاتەرىنە قارسى تۇرۋ ءۇشىن» ۋكراينانى اليانسقا قوسۋدى تالقىلاعان. الايدا، ماسكەۋ تاراپى شىعىس ەۋروپادا باسقىنشىلىق ساياسات جۇرگىزىپ وتىرعانىن تۇبەگەيلى جوققا شىعاردى.

2013 جىلى ەۋرومايدان دەپ اتالعان جاپپاي حالىق تولقۋىنا قاتىسقاندار ۋكراينانىڭ سولتۇستىك اليانس پەن ەۋروپالىق وداققا قوسىلۋىن تالاپ ەتكەن. سونداي-اق ۋكراينانىڭ ۇلتشىلدار ۇيىمى (وۋن) رەسەيدەن ىرگەنى اۋلاق ۇستاپ، ەۋروپوتسەنتريزمگە بەت الۋ كەرەكتىگىن بىرنەشە رەت ەسكەرتكەن. بىراق 2014 جىلعى قىرىم اننەكسياسىنان سوڭ رەسەي تاراپى ۋكراينانى «ۋىستان» شىعارماۋعا تىرىسىپ باقتى. قانشا دەگەنمەن ۋكراينا دا قۇر قالعان جوق: ماسكەۋمەن اراداعى بىرنەشە بايلانىسقا نۇكتە قويدى. ماسەلەن، بيىلعى جىلدىڭ قىركۇيەگىندە پرەزيدەنت پەتر پوروشەنكو ۋكراينا مەن رەسەي اراسىنداعى دوستىق، ىنتىماقتاستىق جانە سەرىكتەستىك كەلىسىمىنىڭ كۇشىن جويۋ تۋرالى جارلىقتى قابىلدادى. ال قازاننان باستاپ ۋكراينانىڭ جيتومير وبلىسى ءورىستىلدى مادەني ونىمدەرگە تولىقتاي تىيىم سالعان بولاتىن. تىيىم اكتىسى بويىنشا، ءورىستىلدى باعدارلاما، فيلمدەردى كورسەتۋگە، اقپاراتتاردى جاريالاۋعا بولمايدى. سونداي-اق، رەسەيلىك ونەرپازداردىڭ گاسترولدىك ساپارمەن كەلۋىنە دە قاتاڭ تىيىم سالىنعان. قارسىلىق شارالار مەن زاڭدار «رەسەي ۋكراينا اۋماعىن باسىپ الۋدان تولىقتاي باس تارتپايىنشا» ءوز كۇشىن جويمايدى.

قازىردىڭ وزىندە ۋكراينا ناتو-مەن بىرلەسكەن اسكەري جاتتىعۋلاردى ءجيى وتكىزەدى. سول سەبەپتەن دە رەسەي ناتو-نىڭ شىعىس ەۋروپاعا قاراي ۇلعايۋىنا قارسى بولۋ ماقساتىندا اۋقىمدى اسكەري جاتتىعۋ وتكىزىپ كەلەدى.

20 مامىردا زەلەنسكي ۋكراينا پرەزيدەنتى لاۋازىمىنداعى العاشقى شەتەلدىك ساپارىن بريۋسسەلدەن باستاۋعا نيەتتى ەكەندىگىن ايتقان. ال كەلەسى ساپارىن ۋاشينگتون مەن تورونتودا جالعاستىرماق. جاڭا پرەزيدەنتتى ۇلىقتاۋ راسىمىنە قاتىسۋعا كەلگەن اقش وكىلدەرىمەن كەزدەسۋدە زەلەنسكي: «دونباسس پەن قىرىمداعى رەسەي اگرەسسياسىنا ءوزىمىز قارسى تۇرا المايمىز. سوندىقتان سىزدەردىڭ كومەكتەرىڭىز كەرەك. ۋكراينا اۋماعىنىڭ تۇتاستىعىن قالىپقا كەلتىرۋ ىسىندە كوشباسشىلىق تانىتىپ، ەل ءىشىن رەفورمالاۋدا كومەك كورسەتكەندەرىڭىز ءۇشىن العىس بىلدىرەمىز جانە امەريكا تارابى رەسەيگە قارسى سانكتسيالاردى كۇشەيتۋدى جالعاستىرسا ەكەن دەيمىز. اقش – ۋكراينانىڭ رەسەي اگرەسسياسىنا قارسى تۇرۋدا قۋاتتى ءارى ءىرى سەرىكتەستەرىنىڭ ءبىرى»، – دەپ مالىمدەدى. سونىمەن قاتار، ۋكراينانىڭ جاڭا پرەزيدەنتى ەلدە اشىق، ءادىل جانە دەموكراتيالىق رەفورما جۇرگىزۋگە ءازىر ەكەنىن ايتتى.

"The Qazaq Times"