Qazaqstan prezidenti Qasım-Jomart Toqaev pen Europalıq keñes basşısı Donal'd Tusk. Foto: https://cdni.rt.com

Aqordada Qazaqstan prezidenti Qasım-Jomart Toqaev pen Europalıq keñes basşısı Donal'd Tusk kelissözder ötkizdi.

Kezdesu barısında Q.Toqaev: «Eñ aldımen meniñ şaqıruımdı qabıl alıp, Qazaqstanğa saparlap kelgeni üşin Europalıq keñes prezidenti Donal'd Tusk mırzağa rizaşılığımdı bildiremin. Bizdiñ öñirge qatıstı Europalıq keñes jaña strategiya qabıldauı ayasında prezident Donal'd Tusktiñ Ortalıq Aziya elderine saparınıñ mañızı ayrıqşa. Bwl qwjat jäne osı sapar Ortalıq Aziyadağı sayasi jäne ekonomikalıq twraqtılıqtı nığaytuda Europalıq taraptıñ küş-jiger jwmıldıruğa dayın ekendigin däleldeydi. Nwr-Swltan qalasında Euraziyalıq ekonomikalıq odaqtıñ mereytoylıq besinşi sammiti ötti. Al Europada parlamenttik saylau ayaqtaldı. Bwl saylaudıñ qorıtındısı europalıq bilikti saqtau isine eleui üles qosatındığına jäne Europanıñ jahandıq arenada quattı jäne ıqpaldı küş bolıp qala beretindigine senimdimin», – dep mälimdedi.

Öz kezeginde Europalıq keñes basşısı Donal'd Tusk: «Qazaqstan Europa men Şığıs, Resey men Oñtüstik Aziya arasındağı köpir sanaladı. Ortalıq Aziya boyınşa öziniñ jaña strategiyasında biz quattı jäne zamanaui äriptestikti qalıptastırudı, energetika, kölik jäne sandıq kommunikaciya salalarındağı äriptestikti tereñdetudi qalaymız», – dedi.

Sonımen qatar, Qazaqstan basşısı Tusktıñ saparı qazaq halqı üşin ayrıqşa künmen twspa-tws kelip otırğanına toqtalıp ötti. «Bügin biz milliondağan adamnıñ ömirin üzgen stalindik sayasi quğın-sürgin  jäne aşarşılıq qwrbandarın eske alamız. Tağdırdıñ tauqımetine tüsken  azamattardıñ arasında qazaqtar ğana  emes, Otanımızğa küştep qonıs audarılğan 1,5 mln  basqa wlt ökilderi de bar. Osı orayda totalitarizm  qwrbandarınıñ «ALJIR» memorialdıq mwrajay keşenine biz ekeuimiz barıp,  tağzım etemiz. Bwl qazaq halqına jäne barlıq quğın-sürgin qwrbandarına  zor qwrmet bolsa kerek», – dep mälimdedi.

Ayta keteyik, 29 mamırda Donal'd Tusk Ortalıq Aziyağa saparın bastağan. Ol 2 mausımğa deyin Täjikstan, Qazaqstan jäne Özbekstandı aralaydı.

"The Qazaq Times"