ەۋروپالىق كەڭەس باسشىسى تۋسك پەن پرەزيدەنت توقاەۆ «الجير» كەشەنىنە بارماق

اقوردادا قازاقستان پرەزيدەنتى قاسىم-جومارت توقاەۆ پەن ەۋروپالىق كەڭەس باسشىسى دونالد تۋسك كەلىسسوزدەر وتكىزدى.

كەزدەسۋ بارىسىندا ق.توقاەۆ: «ەڭ الدىمەن مەنىڭ شاقىرۋىمدى قابىل الىپ، قازاقستانعا ساپارلاپ كەلگەنى ءۇشىن ەۋروپالىق كەڭەس پرەزيدەنتى دونالد تۋسك مىرزاعا ريزاشىلىعىمدى بىلدىرەمىن. ءبىزدىڭ وڭىرگە قاتىستى ەۋروپالىق كەڭەس جاڭا ستراتەگيا قابىلداۋى اياسىندا پرەزيدەنت دونالد تۋسكتىڭ ورتالىق ازيا ەلدەرىنە ساپارىنىڭ ماڭىزى ايرىقشا. بۇل قۇجات جانە وسى ساپار ورتالىق ازياداعى ساياسي جانە ەكونوميكالىق تۇراقتىلىقتى نىعايتۋدا ەۋروپالىق تاراپتىڭ كۇش-جىگەر جۇمىلدىرۋعا دايىن ەكەندىگىن دالەلدەيدى. نۇر-سۇلتان قالاسىندا ەۋرازيالىق ەكونوميكالىق وداقتىڭ مەرەيتويلىق بەسىنشى ءسامميتى ءوتتى. ال ەۋروپادا پارلامەنتتىك سايلاۋ اياقتالدى. بۇل سايلاۋدىڭ قورىتىندىسى ەۋروپالىق بيلىكتى ساقتاۋ ىسىنە ەلەۋى ۇلەس قوساتىندىعىنا جانە ەۋروپانىڭ جاھاندىق ارەنادا قۋاتتى جانە ىقپالدى كۇش بولىپ قالا بەرەتىندىگىنە سەنىمدىمىن»، – دەپ مالىمدەدى.

ءوز كەزەگىندە ەۋروپالىق كەڭەس باسشىسى دونالد تۋسك: «قازاقستان ەۋروپا مەن شىعىس، رەسەي مەن وڭتۇستىك ازيا اراسىنداعى كوپىر سانالادى. ورتالىق ازيا بويىنشا ءوزىنىڭ جاڭا ستراتەگياسىندا ءبىز قۋاتتى جانە زاماناۋي ارىپتەستىكتى قالىپتاستىرۋدى، ەنەرگەتيكا، كولىك جانە ساندىق كوممۋنيكاتسيا سالالارىنداعى ارىپتەستىكتى تەرەڭدەتۋدى قالايمىز»، – دەدى.

سونىمەن قاتار، قازاقستان باسشىسى تۋسكتىڭ ساپارى قازاق حالقى ءۇشىن ايرىقشا كۇنمەن تۇسپا-تۇس كەلىپ وتىرعانىنا توقتالىپ ءوتتى. «بۇگىن ءبىز ميلليونداعان ادامنىڭ ءومىرىن ۇزگەن ستاليندىك ساياسي قۋعىن-سۇرگىن  جانە اشارشىلىق قۇرباندارىن ەسكە الامىز. تاعدىردىڭ تاۋقىمەتىنە تۇسكەن  ازاماتتاردىڭ اراسىندا قازاقتار عانا  ەمەس، وتانىمىزعا كۇشتەپ قونىس اۋدارىلعان 1,5 ملن  باسقا ۇلت وكىلدەرى دە بار. وسى ورايدا توتاليتاريزم  قۇرباندارىنىڭ «الجير» مەموريالدىق مۇراجاي كەشەنىنە ءبىز ەكەۋىمىز بارىپ،  تاعزىم ەتەمىز. بۇل قازاق حالقىنا جانە بارلىق قۋعىن-سۇرگىن قۇرباندارىنا  زور قۇرمەت بولسا كەرەك»، – دەپ مالىمدەدى.

ايتا كەتەيىك، 29 مامىردا دونالد تۋسك ورتالىق ازياعا ساپارىن باستاعان. ول 2 ماۋسىمعا دەيىن تاجىكستان، قازاقستان جانە وزبەكستاندى ارالايدى.

"The Qazaq Times"