Foto: https://static.zakon.kz

Qazaqstannıñ twñğış prezidenti N.Nazarbaev Resey prezidenti V.Putinge «Qazaqstan Respublikasınıñ twñğış prezidenti – Elbası Nazarbaev» ordenin taqtı. Bwl turalı Aqordanıñ baspasöz qızmeti habarladı.

Marapattan keyin Resey prezidenti: «Sizge marapatıñız üşin jäne integraciya isinde, eki jaqtı qarım-qatınastarda, Resey men Qazaqstannıñ özara strategiyalıq is-qimılın damıtuda atqarılğan jwmıstar üşin alğıs aytqım keledi. Bwl rette sizdiñ zor eñbegiñiz bar», – dep alğıs jaudırdı. Al Nazarbaev: «Bes jıl bwrın, Siz jäne Aleksandr Lukaşenko üşeumiz osı odaqtı qwrdıq. Biz jüzege asırğan bwl ideya meniñ tarapımnan 25 jıl bwrın MMU qabırğasında wsınılğan bolatın. Qiın uaqıttarğa qaramastan, aramızdağı özara sauda ösip keledi. Birlesken käsiporındardıñ sanı artuda. Euraziyalıq ekonomikalıq odaq EO, ŞIW, ASEAN jäne basqa da wyımdarmen integraciya jolımen jürui tiis dep esepteymin. Bizge osı jöninde jwmıs isteu kerek», – dedi.

Osığan deyin Qazaqstan prezidenti Qasım-Jomart Toqaev QR memlekettik nagradalarımen Resey, Qırğızstan, Belarus' elderiniñ prezidentterin marapattau turalı qaulığa qol qoyğan bolatın. Qaulıda Vladimir Putin, Aleksandr Lukaşenko jäne Sooronbay Jeenbekovtı Euraziyalıq integraciya ideyasınıñ 25 jıldığı men Euraziyalıq ekonomikalıq odaqtıñ qwrıluına 5 jıl toluına oray «Qazaqstan Respublikasınıñ twñğış prezidenti – Elbası Nwrswltan Nazarbaev» ordenimen marapattau jöninde aytılğan.

"The Qazaq Times"