نازارباەۆ پۋتينگە وردەن تاقتى

قازاقستاننىڭ تۇڭعىش پرەزيدەنتى ن.نازارباەۆ رەسەي پرەزيدەنتى ۆ.پۋتينگە «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نازارباەۆ» وردەنىن تاقتى. بۇل تۋرالى اقوردانىڭ ءباسپاسوز قىزمەتى حابارلادى.

ماراپاتتان كەيىن رەسەي پرەزيدەنتى: «سىزگە ماراپاتىڭىز ءۇشىن جانە ينتەگراتسيا ىسىندە، ەكى جاقتى قارىم-قاتىناستاردا، رەسەي مەن قازاقستاننىڭ ءوزارا ستراتەگيالىق ءىس-قيمىلىن دامىتۋدا اتقارىلعان جۇمىستار ءۇشىن العىس ايتقىم كەلەدى. بۇل رەتتە ءسىزدىڭ زور ەڭبەگىڭىز بار»، – دەپ العىس جاۋدىردى. ال نازارباەۆ: «بەس جىل بۇرىن، ءسىز جانە الەكساندر لۋكاشەنكو ۇشەۋمىز وسى وداقتى قۇردىق. ءبىز جۇزەگە اسىرعان بۇل يدەيا مەنىڭ تاراپىمنان 25 جىل بۇرىن ممۋ قابىرعاسىندا ۇسىنىلعان بولاتىن. قيىن ۋاقىتتارعا قاراماستان، ارامىزداعى ءوزارا ساۋدا ءوسىپ كەلەدى. بىرلەسكەن كاسىپورىنداردىڭ سانى ارتۋدا. ەۋرازيالىق ەكونوميكالىق وداق ەو، شىۇ، اسەان جانە باسقا دا ۇيىمدارمەن ينتەگراتسيا جولىمەن ءجۇرۋى ءتيىس دەپ ەسەپتەيمىن. بىزگە وسى جونىندە جۇمىس ىستەۋ كەرەك»، – دەدى.

وسىعان دەيىن قازاقستان پرەزيدەنتى قاسىم-جومارت توقاەۆ قر مەملەكەتتىك ناگرادالارىمەن رەسەي، قىرعىزستان، بەلارۋس ەلدەرىنىڭ پرەزيدەنتتەرىن ماراپاتتاۋ تۋرالى قاۋلىعا قول قويعان بولاتىن. قاۋلىدا ۆلاديمير پۋتين، الەكساندر لۋكاشەنكو جانە سوورونباي جەەنبەكوۆتى ەۋرازيالىق ينتەگراتسيا يدەياسىنىڭ 25 جىلدىعى مەن ەۋرازيالىق ەكونوميكالىق وداقتىڭ قۇرىلۋىنا 5 جىل تولۋىنا وراي «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ» وردەنىمەن ماراپاتتاۋ جونىندە ايتىلعان.

"The Qazaq Times"