Pompeo Bryussel'ge saparlay bardı. Foto: VOA.

Europalıq Odaqqa müşe elderdiñ sırtqı ister ministrleri Iran mäselesin talqılap jatqan kezde, AQŞ-tıñ memlekettik hatşısı Pompeo kütpegen jerden Bryussel'de payda bola ketti. EO-nıñ sırtqı sayasat pen qauipsizdik jönindegi federaldı ökili Federika Mogerini de AQŞ sırtqı ister ökiliniñ bwl saparı kütpegen jerden bolğanın rastadı. 

Şıntuaytına kelgende, AQŞ memlekettik hatşısı bwl jolı Mäskeu saparına dayındalıp jatqan edi. Mäskeude ol Resey prezidenti Putin jäne SİM basşısı Lavrovpen kezdesudi josparlağan. Bryussel'ge ayaldağan Pompeo Mäskeu saparın bir kün keyinge qaldırdı.

AQŞ Memlekettik departamenti Pompeonıñ EO saparı turalı tüsinikteme berip: «Memlekettik hatşı EO müşelerimen soñğı kezdegi Irannıñ qauipti äreketteri men mälimdemeleri turalı talqılaytın boladı. Tayau-Şığıstağı jäne älemdegi ortaq müddelerimizdi qamtamasız etu üşin, odaqtas seriktesterimizben ıntımaqtastıqtı jalğastıradı», – degen.

Euroodaqqa müşe elderdiñ SİM basşıları Iranmen 2015 jılğı yadrolıq kelisimdi jalğastıru, älde bas tartu turalı şeşim şığaruğa jinalğan bolatın. Federika Mogerini bolsa, Euroodaq qazirge deyin Irannıñ yadrolıq kelisimin qoldaytının, kezekti jiında kelisimdi jalğastıru joldarın qarastıratının aytqan.

Ol jäne kütpegen jerden EO-nıñ ortalığına aynalğan Bryussel'ge saparlay kelgen AQŞ memlekettik hatşısımen kezdesu äli josparda joq ekenin aytqan. «Ärine, biz qarsı alamız. Biraq, bügingi künde bizdiñ kün tärtibimiz tolıq. Kezdesu turalı äli josparlanğan joq», – degen.

Ayta keteyik, AQŞ osıdan tura bir jıl bwrın Iranmen qol qoyısqan kelisimnen bir jaqtı şığıp ketti. İli-şala Iranğa qarsı ekonomikalıq sankciyalardı qalpına keltirdi. Sodan beri birtindep şielenisip kele jatqan AQŞ-Iran qatınası ötken aptada şırqau şıñına şıqqanday boldı.

Iran mwnay eksportına jasalğan tosqauıl, Tehrandı (Tegeran) tığırıqqa tiredi. Iran tarabı AQŞ-tıñ bir jaqtı bas tartuı özge qol qoyğan elderdiñ kelisimdi orındauına keri äserin tigizdi. Tehran özge qol qoyğan elderden 60 kün işinde  kelisim turalı retteu jasaudı talap etti. Olay bolmağanda, Iran uran bayıtudı qayta qolğa alatının jetkizdi.

Pompeonıñ bwl retki Euroodaqqa jasağan saparında, EO müşeleriniñ Iran mäselesi turalı şeşimin özgertuge tırısuı mümkin. Alayda, Iranğa qarsı qısımnıñ artuı öñirdiñ qauipsizdigine qauip töndirip twr. Qazirdiñ özinde, şarasız Iran rejimi qarulı küşke süyenudiñ az-aq aldında twr.

 

“The Qazaq Times”