Foto: https://www.welt.de

M'yanma biligi «memlekettik qwpiya turalı zañ bwzdı» dep 7 jılğa bas bostandığınan ayırılğan Reuters agenttiginiñ eki jurnalisi Va Lon men Soe Oonı qamaudan bosattı. M'yanma prezidenti Vin M'in eki tilşige raqımşılıq jasadı. 

2017 jılı jeltoqsanda M'yanmanıñ aqparat ministrligi Facebook-tegi paraqşasında eki jurnaliske britandıq kolonialdıq däuirinen beri bar memlekettik qwpiya jönindegi zañğa säykes ayıptalıp jatqanın mälimdegen. 1923 jıldan beri qoldanıstağı zañda 14 jılğa deyin türme jazası qarastırılğan. «Jurnalister şeteldik BAQ-qa taratu üşin aqparattı zañsız aldı» degen ayıppen eki tilşi M'yanmanıñ bastı qalası Rangunda wstalğan.

Tilşiler qamauğa alınğannan keyin şeteldik BAQ M'yanma biliginiñ ädiletsizdigin jarısa jazdı. «Reuters» agenttiginiñ bas redaktorı Stiven Adler: «Sottıñ şeşimi sol el biliginiñ qanday ädiletsiz jäne erkindigi joq ekendigin körsetti. Bwl qaulı kezekti ädiletsizdiktiñ ayqın däleli. Reportaj jasau eşqaşan da qılmıs jasadı degendi bildirmeydi. M'yanma biligi şındıq izdegen tilşilerdiñ közin joyğısı keledi», – dep mälimdegen. Biıl qañtarda «Reuters» tilşileri apellyaicyalıq şağım tüsirgenmen, M'yanma sotı qaraudan bas tartqan bolatın. Bwğan qatıstı M'yanmadağı EO elşisi Kristin Şmidt: «M'yanma sotınıñ bwl äreketi dwrıs emes. Apellyaciyanı qabıldap, jurnalisterdi bosatu arqılı öz qatelikterin moyındauı tiis edi. Al bwlar, kerisinşe, M'yanmada söz bostandığı joq ekenin tağı bir märte däleldedi», – dep sınğa alğan bolatın. Sonday-aq, BWW Bas hatşısı Antoniu Guttereş bilik ökilderinen ükimdi dereu arada qayta qaraudı talap etip, M'yanma biligine eskertu jasağan bolatın. «Human rights watch» wyımınıñ ökili Fil Robertson M'yanma sotınıñ bwl şeşimin barlıq tilşilerge qatañ belgi retinde qarau kerektigin ayttı. Biraq, zañı joq elde tilşilerdiñ qwqığın taptatıp otırmaytınının, AQŞ biligi qoldan kelgenşe şeşimdi özgertetinin aytqan.

Foto: cnn.com

Va Lon men Soe Oo – M'yanmadağı rohindja mwsılmandarına qatıstı zorlıq-zombılıqtı zertteumen aynalısqan «Reuters» agenttiginiñ tilşileri. Olar Rakhayn ştatındağı jantürşigerlik jağday men rohindja mwsılmandarı körgen qorlıq turalı materialdar jariyalap kelgen. Sonday-aq biliktegi ädiletsizdikterdi aşıq aytıp, zerttegen. 2018 jılı qırküyekte M'yanma sotı qos tilşige rohindja mwsılmandarı turalı materialdarmen jwmıs isteu kezinde memlekettik qwpiya turalı zañdı bwzdı dep, 7 jılğa bas bostandığınan ayıru turalı ükim şığardı. Biıl amerikalıq «Time» jurnalı qos tilşini «Jıl adamı» atağına layıqtı dep tanıdı. Bostandıqqa şıqqan Va Lon men Soe Oo halıqaralıq aqparat agenttikterine jurnalistik qızmetterin jalğastıra beretinin ayttı.

"The Qazaq Times"