Bir kün bwrın AQŞ memlekettik hatşısı Mayk Pompeo AQŞ-tıñ soñğı kezdegi sırtqı sayasattağı jasap jatqan qadamdarı turalı aşıla ayttı. Ol swhbatında Venesuela prezidenti Nikolas Maduronıñ biliktegi sanaulı künderi qalğanın jetkizgen. Äri, Venesuela isine Qwrama Ştattıñ aralasıp otırğanın rastağan.

Ötken aptada oppoziciya jetekşisi Huan Guaydo Maduronıñ biligin audarıp tastauğa äreket etken, alayda bwl äreketi sätsizdikke wşıradı. Onıñ nätijesinde,  oppoziciya men qarulı küş arasında qaqtığıs orın alğan edi. 

«Maduro öziniñ qazirgi lauazımınıñ saqtalıp qalatınına sene almaydı», – dedi AQŞ memlekettik hatşısı Fox News arnasınıñ «Sunday News Show» bağdarlamasına bergen swhbatında. Ol sözinde Maduronıñ biliktegi sanaulı ğana küni qalğanın aytqan, biraq Maduro biliginiñ qay küni qwlaytının nemese qaşan bilikten ketetinin aşıp aytpağan. 

Pompeo ötken aptadağı qarsılıq şaraları tikeley Maduronı bilikten qwlatuğa bağıttalğanın rastağan. Ötken aptadağı qaqtığısqa baylanıstı keybir halıqaralıq ıqpaldı basılımdarda türli mälimetter taradı. Sonıñ birinde Venesuela oppoziciyasınıñ maqsatına jete almauına AQŞ barlau qızmetkerleriniñ sätsiz äreketteri sebep boldı delingen. 

Mayk Pompeo bwl közqarastı joqqa şığarğanımen, Venesuela oppoziciyasınıñ Maduro biligin qwlatuğa degen qwlşınısın joğarı bağalağan. Äri, Resey, Kuba jäne Irandı Maduro biligin qoldaudı toqtatuğa şaqırğan. «Amerika Qwrama Ştattarı Venesuela halqınıñ demokratiyanı qalpına keltiru küresin tabandı qoldaydı», – deydi Mayk Pompeo. 

“The Qazaq Times”