اقش مەملەكەتتىك حاتشىسى ۆەنەسۋەلا ماسەلەسى تۋرالى سۇحبات بەرگەن. فوتو; Reuters.

ءبىر كۇن بۇرىن اقش مەملەكەتتىك حاتشىسى مايك پومپەو اقش-تىڭ سوڭعى كەزدەگى سىرتقى ساياساتتاعى جاساپ جاتقان قادامدارى تۋرالى اشىلا ايتتى. ول سۇحباتىندا ۆەنەسۋەلا پرەزيدەنتى نيكولاس مادۋرونىڭ بيلىكتەگى ساناۋلى كۇندەرى قالعانىن جەتكىزگەن. ءارى، ۆەنەسۋەلا ىسىنە قۇراما شتاتتىڭ ارالاسىپ وتىرعانىن راستاعان.

وتكەن اپتادا وپپوزيتسيا جەتەكشىسى حۋان گۋايدو مادۋرونىڭ بيلىگىن اۋدارىپ تاستاۋعا ارەكەت ەتكەن، الايدا بۇل ارەكەتى ساتسىزدىككە ۇشىرادى. ونىڭ ناتيجەسىندە،  وپپوزيتسيا مەن قارۋلى كۇش اراسىندا قاقتىعىس ورىن العان ەدى. 

«مادۋرو ءوزىنىڭ قازىرگى لاۋازىمىنىڭ ساقتالىپ قالاتىنىنا سەنە المايدى»، – دەدى اقش مەملەكەتتىك حاتشىسى Fox News ارناسىنىڭ «Sunday News Show» باعدارلاماسىنا بەرگەن سۇحباتىندا. ول سوزىندە مادۋرونىڭ بيلىكتەگى ساناۋلى عانا كۇنى قالعانىن ايتقان، بىراق مادۋرو بيلىگىنىڭ قاي كۇنى قۇلايتىنىن نەمەسە قاشان بيلىكتەن كەتەتىنىن اشىپ ايتپاعان. 

پومپەو وتكەن اپتاداعى قارسىلىق شارالارى تىكەلەي مادۋرونى بيلىكتەن قۇلاتۋعا باعىتتالعانىن راستاعان. وتكەن اپتاداعى قاقتىعىسقا بايلانىستى كەيبىر حالىقارالىق ىقپالدى باسىلىمداردا ءتۇرلى مالىمەتتەر تارادى. سونىڭ بىرىندە ۆەنەسۋەلا وپپوزيتسياسىنىڭ ماقساتىنا جەتە الماۋىنا اقش بارلاۋ قىزمەتكەرلەرىنىڭ ءساتسىز ارەكەتتەرى سەبەپ بولدى دەلىنگەن. 

مايك پومپەو بۇل كوزقاراستى جوققا شىعارعانىمەن، ۆەنەسۋەلا وپپوزيتسياسىنىڭ مادۋرو بيلىگىن قۇلاتۋعا دەگەن قۇلشىنىسىن جوعارى باعالاعان. ءارى، رەسەي، كۋبا جانە يراندى مادۋرو بيلىگىن قولداۋدى توقتاتۋعا شاقىرعان. «امەريكا قۇراما شتاتتارى ۆەنەسۋەلا حالقىنىڭ دەموكراتيانى قالپىنا كەلتىرۋ كۇرەسىن تاباندى قولدايدى»، – دەيدى مايك پومپەو. 

“The Qazaq Times”