Bijan Namdar Zangena (Oñda) MEEW bas hatşısı Mwhammed Sanusi Barkindomen kezdesi. Foto: IRNA.

Iran mwnay isi jönindegi ministrligi mälimdeme jasap, Irannıñ Mwnay eksporttauşı elder wyımına öz müddesi üşin müşe ekenin, eger wyım müşeleri Iran müddesine qarsı äreketterge barsa Tehran qatañ jauap qaytaratının eskertti. Bwl turalı sol eldiñ IRNA aqparattıq agenttigi habarladı.

Iran mwnay ministri Bijan Namdar Zangena atalğan mälimdemesin beysenbi küni eldiñ ortalıq qalasında MEEW bas hatşısı Mwhammed Sanusi Barkindomen kezdesu kezinde jasağan. Ol sözinde: «MEEW keybir müşeleriniñ birjaqtı äreketterinen zardap şegip otır. Bwlay jalğasa berse Mwnay eksporttauşı elder wyımı tarap ketui mümkin. MEEW müşeleri Iranğa qısım jasap, onıñ müddelerin qaterge itermelese, bwl Tehran tarabınan jauapsız qalmaydı», – degen.

Atalğan wyımnıñ bas hatşısı Iran saparında birqatar resmi kezdesuler ötkizgen. Ol qazirgi jağdayda Iran mwnayın älemdik narıqtan alıp tastaudıñ mümkin emes ekenin de eskertken. Irannıñ mwnay eksporttauşı elderdiñ qauımdastığımen jasap otırğan keybir qadamdarı AQŞ-tıñ soñğı sankciya şeşimderine baylanıstı ekeni anıq.

“The Qazaq Times”