Halıqtıñ pikiri eskerilmeyinşe, AES salu şeşimi jüzege aspaydı. Bwl turalı Qazaqstan prezidenti Qasım-Jomart Toqaev Semeyde ötken kezdesu barısında mälimdedi.

Resey prezidentiniñ Qazaqstan aumağında AES turalı wsınısına baylanıstı memleket basşısı Q.Toqaev: «Atom elektr stanciyasın salu salu mäselesi qoğamda qızu talqığa tüsip, pikirtalas tuındap otır. Bwl – kürdeli mäsele. 2030 jılı Qazaqstanda elektr energiyasınıñ jetispeuşiligi bayqaluı mümkin. Sondıqtan, osı mäseleni qazir şeşuimiz qajet. Bwl bizdiñ bükil halıqtıñ müddesine qatıstı bolğandıqtan, öte kürdeli mäsele. Sondıqtan halıq pikiri nazarğa alınadı. Soğan qaray äreket etemiz», – dep mälimdedi.

Osığan deyin QR Enegretika ministrligi taratqan habarlamada: «2030 jılğa qaray Qazaqstannıñ Oñtüstiginde 2,7 GVt-qa deyin bazalıq quat tapşılığı kütilude. Elimizdiñ oñtüstiginde bu-gaz, gidro jäne atom stanciyaların salu siyaqtı ärtürli otın jäne energiya közderin paydalana otırıp, bazalıq jäne manevrlik generaciyanı engizu arqılı tapşılıqtı jabu mümkindigin qarastırıp otır. Tek mümkindikter jäne wsınılatın jobalar tiyanaqtı zerttelgen soñ ğana elektr energiyasın öndiruge Qazaqstan üşin neğwrlım oñtaylı jäne qolaylı tehnologiyalar ayqındalatın boladı. Sol sebepti, aldın ala daurığıp, twjırımdar jasauğa jäne negizsiz alañdauğa sebep joq ekenin habarlaymız», – delingen.

Nwr-Swltanğa AES qwrılısın reseylik tehnologiyamen jürgizudi Qazaqstannıñ prezidenti Qasım-Jomart Toqaevpen Kreml'degi kezdesui kezinde Resey prezidenti Vladimir Putin wsınğan bolatın. 3 säuirde ötken jiında Putin Toqaev ekeui «beybit atom salasındağı seriktestik» jaylı talqılağanın aytqan. Onıñ sözinşe, «uran öndiru jäne bayıtu boyınşa Qazaqstan men Reseydiñ birlesken altı önerkäsibi jwmıs isteydi». Qazaqstanda salınuı ıqtimal atom elektr stanciyasına (AES) arnalğan aumaq retinde Almatı oblısındağı Ülken auılı men Şığıs Qazaqstan oblısındağı Kurçatov qalası tañdalğan. Atalğan mälimdemeden keyin, Qazaqstan azamattarı stanciyadan tönetin orasan zor qauipti aytıp, AES qwrılısınan bas tartudı talap etti.

"The Qazaq Times"