Jeñildetilgen azamattıq beru Mäskeudiñ Zelenskiyge körsetken qırı ma?

Älem elderiniñ basşıları Ukrainanıñ jaña prezidentin qwttıqtap jatqan kezde, Kreml' jaq kirisin aşpadı. Biraq, prezident Putin Ukrainanıñ şığısındağı Doneck pen Lugansk oblısınıñ twrğındarına jeñildetilgen jolmen Resey azamattığın beru turalı jarlıqqa qol qoyıp, resmi atqaruğa berdi.

Kezinde prezident Poroşenko bwnı Reseydiñ Ukrainanıñ şığısında äskeri äreket jürgizuge qwqıqtıq mümkindik alu üşin jasap otırğanın aytqan. «Özderin Doneck pen Lugansk Halıqtıq Respublikası» dep atağan aymaq twrğındarı jeñildetilgen jolmen Resey azamattığına öter bolsa, bwl Resey qarulı küşteriniñ öz azamattarın qorğau jeleuimen aymaqta äskeri operaciya jürgizuine qwqıqtıq mümkindik beredi. Sebebi, RF Konstituciyasında Resey şeteldegi azamattarın qorğauğa mindettelgen.

Negizinde, RF zañına säykes, Resey azamattığı el territoriyasında 5 jıl twrğannan keyin jäne orıs tilinen alınatın emtihannan ötkennen keyin ğana beriledi. Kreml'diñ bwl qadamı Ukrainanıñ jañadan saylanğan prezidenti Vladimir Zelenskiyge jasağan qısım qatarlı da bağalanuda.

Aymaqta qanşa twrğın bar?

Atalğan eki aymaqtağı twrğındarına jeñildetilgen jolmen Resey azamattığı berilse jäne bwl äreketteri nätijeli bolıp jatsa, onda Reseydiñ demografiyalıq jağdayına birqatar özgerister alıp keledi. Doneck pen Lugansk oblıstarında qanşa twrğın bar ekendigi jaylı naqtı mälimet joq. Özderin «Doneck pen Lugansk Halıqtıq Respublikası» atağan wyımnıñ körsetken mälimetine nansaq, öñirde 3,7 mln adam jasaydı.

Alayda, Ukrainanıñ resmileri bolsa bwl aymaqta 2,7-2,8 mln şamasında halıq bar ekenin, köptegen twrğınnıñ Reseyge köşip ketkenin aytqan. Resey İİM de kezinde Ukraina şığısınan millionğa juıq halıq köşip keldi dep mälimdegen.

Resey azamattığın alu birjaqtı jüzege aspauı mümkin

Qazirge deyin Putin qol qoyğan jarlıqqa Ukraina şığısındağı qaysı aymaqtarğa qaratılğanı belgisiz. Eki el zañına säykes bir eldiñ azamattığınan bas tartqannan keyin ğana ekinşi eldiñ azamattığın aluına boladı. Demek, atalğan eki oblıs twrğındarı Resey azamattığın alu üşin eñ äueli Ukraina azamattığınan bas tartuı kerek.

Resey azamattığın beruge qwziretti mekemeleri İşki ister ministrliginen tıs, şeteldegi elşilikteri bolıp sanaladı. Putin qol qoyğan jarlıq boyınşa eki oblıs twrğındarı Reseydiñ İşki ister ministrligi arqılı aluı kerek. Doneck pen Lugansk oblıstarında Reseydiñ İİM bölimşeleri joq. Demek, Resey azamattığın alğısı kelgen twrğındar körşiles jatqan Rostov oblısına baruı kerek.

Resey azamattığın taratu bwdan bwrın da Resey-Gruziya tiresi kezinde de bolğan. Sol twsta Abhaziya twrğındarına Resey azamattığı jappay taratılıp edi.

Mäskeudiñ közdegeni

Birqatar eldiñ basılımdarı bwl turalı saraptaularında, Reseydiñ kezekti qadamı jaña prezidentke degen eskertu dep bağalağan. Rasında da, atalğan eki oblıs twrğındarına Resey azamattığın beru Mäskeu üşin asa mañızdı da, kerek te emes. Onsız da bwl aymaqtıñ twrğındarı Reseyge emin-erkin kirip şığıp jür. Tek, Mäskeu bwl arqılı jaña prezidentke belgili därejede qısım tüsirip, kelissözderdi qayta bastaudıñ mümkin emestigin körsetkisi keledi. Sol arqılı Ukrainanı kelissöz talaptarın jeñildetuge köndirgisi keledi.

Zelenskiy bwl jöninde jalt qaratar mälimet jasamadı. Tek, bwl beybitşilik pen soğıs toqtatuğa kedergi keltiredi degen mağınadağı bağasın ğana berdi. Al, Ukrainanıñ SİM tarabı Doneck pen Lugansk twrğındarın Resey azamattığın almauğa şaqıruda. Qazirge, Ukraina tarabı bwğan qarsı körnekti qadam jasamadı deuge de boladı. Jaña saylanğan Zelenskiy öz «komandasımen» Reseyge qanday poziciya wstanatını da belgisiz.

“The Qazaq Times”