Putin men Kim Qiır-Şığısta kezdesti. Foto; VALERIY SHARIFULIN\TASS

Resey prezidenti Vladimir Putin men Kim Joñ Unnıñ kezdesui Soltüstik Koreya ekonomikalıq jäne sayasi qısımdar astında, qiın qalde twrğan kezge twspa-tws kelip otır. Äri, V'etnamda ötken ekinşi «Tramp-Kim» sammiti sätsiz ayaqtalğannan keyin Soltüstik Koreya basşısınıñ alğaş ret resmi sapar jasauı. Bwğan deyin Kim men Putin arasında kezdesu bolğan emes.  

Qiır-Şığıs Federaldıq Universitetinde ötken kezdesude RF prezidenti Putin: «Eki Koreya arasındağı dialogtı jandandıruğa jäne Soltüstik Koreya men AQŞ arasındağı mämileni jönge saludağı jasağan äreketiñizdi biz qoldaymız», – dep iltipat tanıttı. Kim de öz sözinde: «Qwrmetti prezident mırza, bizdiñ bwl kezdesuimiz KHDR men RF arasında dästürge aynalğan, tereñ tamır tartqan dostıqtı odan arı damıtuğa oñ äserin beredi dep ümittenemin», – dedi.

Putinniñ baspasöz ökili Dmitriy Peskov mälimdemesinde, eki el basşısı jeke keñes ötkizip, keyin keñeytilgen kezdesu jasağan. Kezdesude eki el qatınasın damıtu, Korey tübegin yadrolıq qarusızdandıru jäne aymaqtıq qızmettestik taqırıptarı söz bolğan.

Reseyge äkesi Kim Joñ Il (orısşa – Kim Çen Ir) sekildi sauttı poyızben kelgen Kim Joñ Un, bwl saparı arqılı AQŞ-tıñ qısımına qarsı twra alatının körsetkisi keledi dep qaraydı avstraliyalıq sayasi sarapşılar. Jon Kertin atındağı universitettiñ professorı Aleksey Murav'ev BBC-ge bergen swhbatında: «Eger Soltüstik Koreya iri derjavalardıñ biriniñ qoldauına ie bolğanın körsete alsa, bwl onıñ AQŞ nemese Qıtaymen söylesudegi köziri bola aladı», – degen pikirin aytqan.

Onıñ aytuınşa, Kim Joñ Un eldiñ ekonomikalıq müddesi jäne rejimniñ tağdırı bäske tigilgen oyındı asa şeberlikpen jürgizip keledi. Jıl basınan beri Resey men Soltüstik Koreya arasındağı resmi almasular jiiley tüsti. Qıtaymen de barıs kelis köbeydi. Soltüstik Koreya Reseymen ekonomikalıq baylanıstı jaqsartu turalı jäne eki el şekarasındağı Tuman dariyasına köpir salu turalı birqatar jobalardı da wsınğan. Putin men Kim arasındağı kezdesude de temir jol qwrılısı, gaz qwbırı jobası turalı kelisimge kelui mümkin degen boljamdar da bar.

Degenmen, eki el birlesken jobalarda adam qwqığınıñ auır därejede taptalıp jatqanı turalı birer jıl bwrın älem aqparat qwraldarı habarlağan bolatın. Soltüstik Koreya arzan jwmıs küşin şetelderge şığaradı. Alayda, jwmıskerler mardımsız jalaqı aladı nemese tegin jwmıs isteydi. Al, olardıñ istegen qwrılıs nısandar, iri jobalardıñ eñbek aqısı Kim äuletiniñ qaltasın toltıradı.

“The Qazaq Times”