سولتۇستىك كورەيا باسشىسىنىڭ رەسەي ساپارىنداعى كوزدەگەنى نە؟

رەسەي پرەزيدەنتى ۆلاديمير پۋتين مەن كيم جوڭ ۋننىڭ كەزدەسۋى سولتۇستىك كورەيا ەكونوميكالىق جانە ساياسي قىسىمدار استىندا، قيىن قالدە تۇرعان كەزگە تۇسپا-تۇس كەلىپ وتىر. ءارى، ۆەتنامدا وتكەن ەكىنشى «ترامپ-كيم» ءسامميتى ءساتسىز اياقتالعاننان كەيىن سولتۇستىك كورەيا باسشىسىنىڭ العاش رەت رەسمي ساپار جاساۋى. بۇعان دەيىن كيم مەن پۋتين اراسىندا كەزدەسۋ بولعان ەمەس.  

قيىر-شىعىس فەدەرالدىق ۋنيۆەرسيتەتىندە وتكەن كەزدەسۋدە رف پرەزيدەنتى پۋتين: «ەكى كورەيا اراسىنداعى ديالوگتى جانداندىرۋعا جانە سولتۇستىك كورەيا مەن اقش اراسىنداعى مامىلەنى جونگە سالۋداعى جاساعان ارەكەتىڭىزدى ءبىز قولدايمىز»، – دەپ ءىلتيپات تانىتتى. كيم دە ءوز سوزىندە: «قۇرمەتتى پرەزيدەنت مىرزا، ءبىزدىڭ بۇل كەزدەسۋىمىز كحدر مەن رف اراسىندا داستۇرگە اينالعان، تەرەڭ تامىر تارتقان دوستىقتى ودان ارى دامىتۋعا وڭ اسەرىن بەرەدى دەپ ۇمىتتەنەمىن»، – دەدى.

ءپۋتيننىڭ ءباسپاسوز وكىلى دميتري پەسكوۆ مالىمدەمەسىندە، ەكى ەل باسشىسى جەكە كەڭەس وتكىزىپ، كەيىن كەڭەيتىلگەن كەزدەسۋ جاساعان. كەزدەسۋدە ەكى ەل قاتىناسىن دامىتۋ، كورەي تۇبەگىن يادرولىق قارۋسىزداندىرۋ جانە ايماقتىق قىزمەتتەستىك تاقىرىپتارى ءسوز بولعان.

رەسەيگە اكەسى كيم جوڭ يل (ورىسشا – كيم چەن ىر) سەكىلدى ساۋتتى پويىزبەن كەلگەن كيم جوڭ ۋن، بۇل ساپارى ارقىلى اقش-تىڭ قىسىمىنا قارسى تۇرا الاتىنىن كورسەتكىسى كەلەدى دەپ قارايدى اۆستراليالىق ساياسي ساراپشىلار. جون كەرتين اتىنداعى ۋنيۆەرسيتەتتىڭ پروفەسسورى الەكسەي مۋراۆەۆ BBC-گە بەرگەن سۇحباتىندا: «ەگەر سولتۇستىك كورەيا ءىرى دەرجاۆالاردىڭ ءبىرىنىڭ قولداۋىنا يە بولعانىن كورسەتە السا، بۇل ونىڭ اقش نەمەسە قىتايمەن سويلەسۋدەگى كوزىرى بولا الادى»، – دەگەن پىكىرىن ايتقان.

ونىڭ ايتۋىنشا، كيم جوڭ ۋن ەلدىڭ ەكونوميكالىق مۇددەسى جانە رەجيمنىڭ تاعدىرى باسكە تىگىلگەن ويىندى اسا شەبەرلىكپەن جۇرگىزىپ كەلەدى. جىل باسىنان بەرى رەسەي مەن سولتۇستىك كورەيا اراسىنداعى رەسمي الماسۋلار جيىلەي ءتۇستى. قىتايمەن دە بارىس كەلىس كوبەيدى. سولتۇستىك كورەيا رەسەيمەن ەكونوميكالىق بايلانىستى جاقسارتۋ تۋرالى جانە ەكى ەل شەكاراسىنداعى تۋمان دارياسىنا كوپىر سالۋ تۋرالى بىرقاتار جوبالاردى دا ۇسىنعان. پۋتين مەن كيم اراسىنداعى كەزدەسۋدە دە تەمىر جول قۇرىلىسى، گاز قۇبىرى جوباسى تۋرالى كەلىسىمگە كەلۋى مۇمكىن دەگەن بولجامدار دا بار.

دەگەنمەن، ەكى ەل بىرلەسكەن جوبالاردا ادام قۇقىعىنىڭ اۋىر دارەجەدە تاپتالىپ جاتقانى تۋرالى بىرەر جىل بۇرىن الەم اقپارات قۇرالدارى حابارلاعان بولاتىن. سولتۇستىك كورەيا ارزان جۇمىس كۇشىن شەتەلدەرگە شىعارادى. الايدا، جۇمىسكەرلەر ماردىمسىز جالاقى الادى نەمەسە تەگىن جۇمىس ىستەيدى. ال، ولاردىڭ ىستەگەن قۇرىلىس نىساندار، ءىرى جوبالاردىڭ ەڭبەك اقىسى كيم اۋلەتىنىڭ قالتاسىن تولتىرادى.

“The Qazaq Times”