Foto: espreso.tv

Londondağı "Extinction Rebellion"  ("Joyıluğa qarsı köterilis") qozğalısı wyımdastırğan narazılıq akciyaları bir aptağa sozıldı. Osı uaqıtta London policiyası mıñnan astam belsendini qamauğa aldı, dep jazadı VVS.

Düysenbi küni äkoşeruşiler Londonnıñ bes audanında narazılıq akciyasın ötkizdi. Şeruge şıqqan bir top qaladağı Tabiğat tarihi mwrajayınıñ birneşe zalın "basıp" aldı. Atalğan muzeydiñ bir zalına jinalğan jüzge juıq belsendi edenge jatu arqılı januarlardıñ keybir türlerin jappay qırıp-joyu problemasına qoğamnıñ nazarın audartqısı kelgen.

Foto: VVS

Wlıbritaniya astanasınıñ meri Sadıq Hannıñ aytuınşa, ereuilder bizneske eleuli zarar keltirip qana qoymay, qalalıq policiyağa da köptegen qiınşılıq tuğızğan. "Kündelikti bolıp jatqan narazılıq akciyaları bizdiñ qılmıspen küresimizge keri äserin tigeze me dep alañdaymın" deydi ol öz sözinde.

Al, London policiyasınıñ komissarı Kressi Diktiñ sözine süyensek, sayasatkerler qozğalıstıñ ökilderimen kelissöz ötkizbeyinşe, bwl narazılıq akciyaları toqtamaydı, kerisinşe odan arı üdey tüspek.

VVS aqparat agenttiginiñ habarlauınşa, 15 säuirden bergi narazılıq kezinde şamamen toğız mıñğa juıq policiya qızmetkeri tärtipti qadağalauda. Osı uaqıt işinde 1065 adam twtqındalğan. Olardıñ 53-i ärtürli qwqıq bwzuşılıqtarı üşin ayıptalıp otır.

Foto: espreso.tv

Ayta keteyik, "Extinction Rebellion"  ("Joyıluğa qarsı köterilis") qozğalısı  ötken jılı qwrıldı. Osı uaqıt işinde atalğan top ärtürli is-şaralar, atap aytsaq, köpirlerge tosqauıl qoyu, VVS ğimaratınıñ aldındağı piket, britandıq parlament mäjilisindegi striptiz sındı şaralar wyımdastırğan. Olardıñ negizgi talaptarı - klimattıñ özgerui turalı şındıqtı jariyalau, 2025 jılğa qaray atmosferağa kömirqışqıl gaz şığarındıların azaytıp,  ekologiyalıq reformalardı qadağalaytın qoğamdıq keñes qwru.

"The Qazaq Times"