فوتو: espreso.tv

لوندونداعى "Extinction Rebellion"  ("جويىلۋعا قارسى كوتەرىلىس") قوزعالىسى ۇيىمداستىرعان نارازىلىق اكتسيالارى ءبىر اپتاعا سوزىلدى. وسى ۋاقىتتا لوندون پوليتسياسى مىڭنان استام بەلسەندىنى قاماۋعا الدى، دەپ جازادى ۆۆس.

دۇيسەنبى كۇنى اكوشەرۋشىلەر لوندوننىڭ بەس اۋدانىندا نارازىلىق اكتسياسىن وتكىزدى. شەرۋگە شىققان ءبىر توپ قالاداعى تابيعات تاريحي مۇراجايىنىڭ بىرنەشە زالىن "باسىپ" الدى. اتالعان مۋزەيدىڭ ءبىر زالىنا جينالعان جۇزگە جۋىق بەلسەندى ەدەنگە جاتۋ ارقىلى جانۋارلاردىڭ كەيبىر تۇرلەرىن جاپپاي قىرىپ-جويۋ پروبلەماسىنا قوعامنىڭ نازارىن اۋدارتقىسى كەلگەن.

فوتو: ۆۆس

ۇلىبريتانيا استاناسىنىڭ مەرى سادىق حاننىڭ ايتۋىنشا، ەرەۋىلدەر بيزنەسكە ەلەۋلى زارار كەلتىرىپ قانا قويماي، قالالىق پوليتسياعا دا كوپتەگەن قيىنشىلىق تۋعىزعان. "كۇندەلىكتى بولىپ جاتقان نارازىلىق اكتسيالارى ءبىزدىڭ قىلمىسپەن كۇرەسىمىزگە كەرى اسەرىن تيگەزە مە دەپ الاڭدايمىن" دەيدى ول ءوز سوزىندە.

ال، لوندون پوليتسياسىنىڭ كوميسسارى كرەسسي ديكتىڭ سوزىنە سۇيەنسەك، ساياساتكەرلەر قوزعالىستىڭ وكىلدەرىمەن كەلىسسوز وتكىزبەيىنشە، بۇل نارازىلىق اكتسيالارى توقتامايدى، كەرىسىنشە ودان ارى ۇدەي تۇسپەك.

ۆۆس اقپارات اگەنتتىگىنىڭ حابارلاۋىنشا، 15 ساۋىردەن بەرگى نارازىلىق كەزىندە شامامەن توعىز مىڭعا جۋىق پوليتسيا قىزمەتكەرى ءتارتىپتى قاداعالاۋدا. وسى ۋاقىت ىشىندە 1065 ادام تۇتقىندالعان. ولاردىڭ 53-ءى ءارتۇرلى قۇقىق بۇزۋشىلىقتارى ءۇشىن ايىپتالىپ وتىر.

فوتو: espreso.tv

ايتا كەتەيىك، "Extinction Rebellion"  ("جويىلۋعا قارسى كوتەرىلىس") قوزعالىسى  وتكەن جىلى قۇرىلدى. وسى ۋاقىت ىشىندە اتالعان توپ ءارتۇرلى ءىس-شارالار، اتاپ ايتساق، كوپىرلەرگە توسقاۋىل قويۋ، ۆۆس عيماراتىنىڭ الدىنداعى پيكەت، بريتاندىق پارلامەنت ماجىلىسىندەگى ستريپتيز سىندى شارالار ۇيىمداستىرعان. ولاردىڭ نەگىزگى تالاپتارى - كليماتتىڭ وزگەرۋى تۋرالى شىندىقتى جاريالاۋ، 2025 جىلعا قاراي اتموسفەراعا كومىرقىشقىل گاز شىعارىندىلارىن ازايتىپ،  ەكولوگيالىق رەفورمالاردى قاداعالايتىن قوعامدىق كەڭەس قۇرۋ.

"The Qazaq Times"