Terrorlıq şabuıl jasalğan şirkeu. Foto: Sputnik .

Şri-Lankada qatarınan 8 jerde terrorlıq şabuıl bolıp, 262 adam qaza tauıp, 400den astam adam jaraqat alğan. Jergilikti policiyanıñ mälimetine qarağanda terrorlıq şabuıl bir uaqıtta 3 qonaq üy, 3 şirkeu jäne twrğındar şoğırlı ornalasqan eki orınğa bağıttalğan.

Şri-Lankanıñ SİM tarabı jasağan mälimdemede, qaza bolğandar arasında 27 şeteldik azamat bar. Bwğan deyin, Türkiya men Ündistan Sırtqı ister ministrlikteri qaza tapqandar arasında öz azamattarınıñ bar ekeni turalı mälimdedi. Ortalıq qala mañındağı küdiktilerge bağıttalğan qarulı operaciya kezinde eki policey qaza tapqan.

BBC jergilikti policiyanıñ mälimetine siltime jasay otırıp, terrorolıq şabuıldıñ azanğı uaqıtta Kohçaykade, Katana, Battikaloa qalalarındağı şirkeuler men eldiñ ortalıq qalası Kolomboda bes jwldızdı Şangri-La, Sinnamon Grand jäne Kingsberi qonaqüylerine bağıttalğanın habarladı. Bwlardan tıs Kolombo qalasına jaqın ornalasqan Dehivala qalasındağı eki jerde jarılıs bolğan.

Eldegi jağdayğa baylanıstı komendanttıq sağat jariyalanıp, qauipsizdik küşter attanısqa keltirildi. Qazirge deyin eşbir terrorlıq wyım terrorlıq şabuıl turalı mälimdeme jasamağan.

“The Qazaq Times”