تەررورلىق شابۋىل جاسالعان شىركەۋ. فوتو: Sputnik .

شري-لانكادا قاتارىنان 8 جەردە تەررورلىق شابۋىل بولىپ، 262 ادام قازا تاۋىپ، 400دەن استام ادام جاراقات العان. جەرگىلىكتى پوليتسيانىڭ مالىمەتىنە قاراعاندا تەررورلىق شابۋىل ءبىر ۋاقىتتا 3 قوناق ءۇي، 3 شىركەۋ جانە تۇرعىندار شوعىرلى ورنالاسقان ەكى ورىنعا باعىتتالعان.

شري-لانكانىڭ ءسىم تارابى جاساعان مالىمدەمەدە، قازا بولعاندار اراسىندا 27 شەتەلدىك ازامات بار. بۇعان دەيىن، تۇركيا مەن ءۇندىستان سىرتقى ىستەر مينيسترلىكتەرى قازا تاپقاندار اراسىندا ءوز ازاماتتارىنىڭ بار ەكەنى تۋرالى مالىمدەدى. ورتالىق قالا ماڭىنداعى كۇدىكتىلەرگە باعىتتالعان قارۋلى وپەراتسيا كەزىندە ەكى پوليتسەي قازا تاپقان.

BBC جەرگىلىكتى پوليتسيانىڭ مالىمەتىنە سىلتىمە جاساي وتىرىپ، تەررورولىق شابۋىلدىڭ ازانعى ۋاقىتتا كوحچايكادە، كاتانا، باتتيكالوا قالالارىنداعى شىركەۋلەر مەن ەلدىڭ ورتالىق قالاسى كولومبودا بەس جۇلدىزدى شانگري-لا، سيننامون گراند جانە كينگسبەري قوناقۇيلەرىنە باعىتتالعانىن حابارلادى. بۇلاردان تىس كولومبو قالاسىنا جاقىن ورنالاسقان دەحيۆالا قالاسىنداعى ەكى جەردە جارىلىس بولعان.

ەلدەگى جاعدايعا بايلانىستى كومەندانتتىق ساعات جاريالانىپ، قاۋىپسىزدىك كۇشتەر اتتانىسقا كەلتىرىلدى. قازىرگە دەيىن ەشبىر تەررورلىق ۇيىم تەررورلىق شابۋىل تۋرالى مالىمدەمە جاساماعان.

“The Qazaq Times”