Foto: http://www.review.uz

AES jöninde daurığudıñ eş qajeti joq, – dep habarladı QR Energetika ministrligi.

Resey prezidentiniñ Qazaqstan aumağında atom elektr stanciyasın salu turalı wsınısına baylanıstı QR Energetika ministrligi taratqan habarlamada: «2030 jılğa qaray Qazaqstannıñ Oñtüstiginde 2,7 GVt-qa deyin bazalıq quat tapşılığı kütilude. Elimizdiñ oñtüstiginde bu-gaz, gidro jäne atom stanciyaların salu siyaqtı ärtürli otın jäne energiya közderin paydalana otırıp, bazalıq jäne manevrlik generaciyanı engizu arqılı tapşılıqtı jabu mümkindigin qarastırıp otır. Salınuı mümkin AES-tiñ ekonomikalıq jäne tehnikalıq parametrlerin naqtılau jäne reaktorlıq tehnologiyanı tañdau üşin Tehnikalıq-ekonomikalıq negizdemeniñ Marketingtik bölimi äzirlendi. Bwdan basqa, äleuetti investorlar elimizdiñ oñtüstik öñirlerinde manevrli gaz generaciyasın, sonday-aq Ertis özeninde Şülbi GES jäne İle özeninde Qapşağay GES kontrregulyatorların salu mäselesin qarastıruda. Şımkent Jılu elektr ortalığı alañında quatı şamamen 450 MVt bolatın jaña bu-gaz elektr stanciyasın salu jöninde wsınıs berildi. Tek mümkindikter jäne wsınılatın jobalar tiyanaqtı zerttelgen soñ ğana elektr energiyasın öndiruge Qazaqstan üşin neğwrlım oñtaylı jäne qolaylı tehnologiyalar ayqındalatın boladı. Sol sebepti, aldın ala daurığıp, twjırımdar jasauğa jäne negizsiz alañdauğa sebep joq ekenin habarlaymız», – delingen.

Nwr-Swltanğa AES qwrılısın reseylik tehnologiyamen jürgizudi Qazaqstannıñ uaqıtşa prezidenti Qasım-Jomart Toqaevpen Kreml'degi kezdesui kezinde Resey prezidenti Vladimir Putin wsınğan bolatın. 3 säuirde ötken jiında Putin Toqaev ekeui «beybit atom salasındağı seriktestik» jaylı talqılağanın aytqan. Onıñ sözinşe, «uran öndiru jäne bayıtu boyınşa Qazaqstan men Reseydiñ birlesken altı önerkäsibi jwmıs isteydi».

Qazaqstanda salınuı ıqtimal atom elektr stanciyasına (AES) arnalğan aumaq retinde Almatı oblısındağı Ülken auılı men Şığıs Qazaqstan oblısındağı Kurçatov qalası tañdalğan. Atalğan mälimdemeden keyin, Qazaqstan azamattarı stanciyadan tönetin orasan zor qauipti aytıp, AES qwrılısınan bas tartudı talap etti.

"The Qazaq Times"