Tramp Venesuela äskerlerine eskertu jasadı. Foto: VOA.

Amerika Qwrama Ştattarınıñ prezidenti Donal'd Tramp Venesuelanı tağı bir märte socializmnen bas tartuğa şaqırdı. Ol sonımen birge AQŞ-tıñ «beybitşilikti saqtauğa küş salatının, alayda barlıq mümkindikterdi qoldanudı joqqa şığarmaytının»  aytqan. Onıñ bwl sözi Venesuelağa qarsı äskeri küş qoldanudıñ mümkin ekendigin meñzegen.

AQŞ prezidenti sözinde Venesuelanıñ qarulı küşterine ündeu tastap,  prezident Maduronıñ nwsqauların elemeuge, kerisinşe mäjilis spikeri Guaydonıñ bwyrığına bağınuğa şaqırğan. Sebebi, Qwrama Ştat bastağan 50-ge juıq memlekettiñ Huan Guaydonı Venesuelanıñ uaqıtşa prezidenti retinde moyındaytının alğa tartqan.

Prezident Tramp Venesuelanıñ äskerlerine eskertu jasap: «Sizder qauipsiz jer taba almaysızdar,  qaşıp ketu de qiınğa soğadı, barar jer, basar tau joq, bärin joğaltıp alasızdar», – degen. Sonımen birge Venesuelağa jetkizilip jatqan gumanitarlıq kömekterge kedergi jasamaudı eskertedi.

Keşe Venesuelağa jetkiziletin gumanitarlıq kömekterge AQŞ-tıñ äskeri wşaqtarı da aralasa bastağanı habarlanğan bolatın. Batıs aqparat qwraldarı bwl äreket Nikolas Maduronıñ biligin älsiretuge ıqpal etetinin aytqan.

Nikolas Maduro Qwrama Ştat qatarlı elderden keletin gumanitarlıq kömektiñ qajet emes ekenin aytıp, bwl zattar AQŞ äskeriniñ Venesuelağa kiruine jol aşatının aytqan.

Qazir Venesuelada azıq-tülik, däri-därmek jäne twrmıstıq twtınu bwyımdarınıñ tapşılığı artuda. Inflyaciya älemdegi eñ joğarı körsetkişke jetken Venesuelada soñğı jıldarı 3 mln adam şetelge qonıs audarğan. Bwl el halqınıñ 10 payızın qwraydı.

 “The Qazaq Times”